АҚШ президенти Эронни музокарага чорлаш ҳақида хаёл сурияпти

Америка қўшма штатлари президенти яна бир бор Эроннинг музокара столига ўтиришини ва янги келишувга эришиш мумкинлигини иддао қилди. 

АҚШ президенти Доналд Трамп чоршанба куни Нью-Йоркдаги ахборот анжуманидаги чиқишида Эрон ядровий келишувини энг ёмон келишув деб ататди.

Ваҳоланки, Трамп бошчилигида ўтказилган БМТ Хавфсизлик кенгашида, хавфсизлик кенгашининг 14 аъзоси ядровий келишувни қўллаб-қувватлашларини ва мазкур халқаро келишувнинг давом этишини истадилар. 

"Американинг Эрон ядровий дастури билан боғлиқ барча санкциялари ноябрь ойи бошида тўлиқ кучга киради. Шундан сўнг АҚШ Эронга қаршилик қилиш мақсадида қўшимча, аввалгидан-да қатъий санкциялар киритишда давом этади", - деди Трамп. 

"Бу санкцияларни бажармайдиганлар жиддий муаммолар билан тўқнашади", - дея ишонтирди Америка етакчиси. У БМТ хавфсизлик кенгаши аъзоларига Эронга нисбатан биргаликда чора кўришни сўраб мурожаат қилди. 

Франция президенти Эммануэль Макрон Нью-Йоркдаги БМТ Бош ассамблеяси йиғилиши вақтида АҚШ президенти Дональд Трампнинг Эронни яккалантириб қўйиш зарурлиги ҳақидаги сўзларига танқид билан жавоб қайтарди, бироқ Америка Қўшма Штатлар ёки мамлакат етакчиси номини тилга олмади. 

«Бу бир томонлама йўл бизни бевосита зиддият ҳамда можароларга олиб боради, бунда барча зарар кўради, ҳаттоки ўзини энг кучли деб ҳисоблайдиганлар ҳам маълум бир қийинчиликларга дуч келади», - дея айтиб ўтди Макрон. У ҳеч кимнинг номини тилга олмаган.

Шундан сўнг, Франция президентининг қўшимча қилишича, «бир томонлама босим» Эрондаги вазиятни барқарорлаштириш жараёнини бошлаш учун ёрдам бермайди. 

Бундан ташқари, Франция президенти Америка етакчисини Эронга нефть экспортини давом эттириш имконини беришга чақириб, буни жаҳондаги нефть нархларини қўллаб-қувватлаш, деб изоҳлади.