Пезешкиён: Эрон ва Россия ўртасидаги стратегик ҳамкорлик ривожланади

Эрон Президенти Теҳрон ва Москва ўртасидаги келишув ва битимларни амалга оширишни жадаллаштириш зарурлигини таъкидлаб, Эрон ва Россия умумий имкониятларга таяниш ҳамда минтақавий ва халқаро механизмлардан фойдаланиш орқали тинчлик, барқарор хавфсизлик ва кўп томонлама тартибни мустаҳкамлашда самарали роль ўйнаши мумкинлигини айтди.

ParsToday хабар беришича, Эрон Президенти Масъуд Пезешкиён душанба куни Россия ташқи ишлар вазири Сергей Лавров билан учрашувда икки мамлакат ўртасидаги муносабатлар ва ҳамкорликнинг ривожланиб бораётганидан мамнунлигини билдириб, Теҳрон ва Москва ўртасидаги стратегик муносабатлар доирасида икки томонлама ҳамкорлик даражасини ошириш, сиёсий ва дипломатик мувофиқлашувни мустаҳкамлаш ҳамда келишувларни изчил амалга ошириш зарурлигини таъкидлади.

У Россия Президенти Владимир Путин билан яқинда ўтказган учрашувлари ва мулоқотларига тўхталиб, Россия Президенти билан мунтазам маслаҳатлашувлар давомида икки томонлама келишувлар, уларни амалга ошириш режалари ва қўшма ҳамкорликни ривожлантиришга оид масалалар жиддий равишда кўриб чиқилаётганини айтди. Шунингдек, у Россияга бўлажак сафари чоғида келишувларни амалда рўёбга чиқариш ва келишилган соҳаларда аниқ натижаларга эришиш учун зарур шароит яратилишига умид билдирди.

Пезешкиён, шунингдек, сўнгги уруш давомида Россия Президенти, ҳукумати ва халқи билдирган позиция ҳамда кўрсатган ёрдами учун миннатдорлик билдириб, икки мамлакатнинг умумий манфаатлари йўлида ўзаро қўллаб-қувватлашни давом эттириш ва сиёсий-дипломатик ҳамкорликни мустаҳкамлаш муҳимлигини таъкидлади.

Учрашувнинг бошқа қисмида у минтақавий воқеалар, шунингдек, Исроил режими ва АҚШнинг Эронга қарши сўнгги тажовузларига тўхталиб, Инқилоб раҳбари, қўмондонлар, олимлар ва ўқувчиларнинг шаҳид қилиниши, шунингдек, мамлакат инфратузилмасига зарба берилиши ҳеч қандай ҳуқуқий ва халқаро мезонларга мос келмаслигини айтди. Унинг таъкидлашича, бу ҳаракатлар Эрон Ислом Республикаси мулоқот ва дипломатик ҳамкорлик йўлидан бораётган бир пайтда содир этилган.

Пезешкиён таъкидлашича, Эрон Ислом Республикаси бирор мамлакатнинг куч ва босим воситаларига таяниб, ўз иродаси ва талабларини бошқа халқларга мажбуран ўтказишини қабул қилмайди. Эрон ўзаро ҳурмат, халқлар ҳуқуқларига риоя қилиш, конструктив ҳамкорлик ва кўп томонлама ҳамкорликка асосланган дунёни истайди. Шунингдек, Россия ҳам бу масалаларда Эрон билан муштарак қарашлар ва ҳамоҳанг ёндашувга эга эканини таъкидлади.

Россия ташқи ишлар вазири Сергей Лавров ҳам учрашувда Москва Теҳрон билан ҳамкорликни мустаҳкамлашга қатъий бел боғлаганини таъкидлади. У нефть ва газ, алоқа ва оммавий ахборот воситалари, маданий ҳамкорлик, транспорт, энергетика, шунингдек, илм-фан ва университетлар ўртасидаги алоқаларни кенгайтиришни икки мамлакат ҳамкорлигининг муҳим йўналишлари сифатида қайд этди.

Россия ташқи ишлар вазири Эрон ва Россиянинг халқаро масалалар бўйича қарашлари бир-бирига яқин эканини таъкидлаб, дипломатик маслаҳатлашувларни давом эттириш ва мавжуд имкониятлардан тинчлик ҳамда хавфсизликни мустаҳкамлаш йўлида фойдаланиш муҳимлигини айтди.

Лавров, шунингдек, Каспий денгизи соҳасида эришилган келишувларга тўхталиб, икки мамлакат манфаатларини ҳимоя қилиш ва минтақавий мувофиқлашувни кучайтириш учун қўшма ҳамкорликни мустаҳкамлаш зарурлигини таъкидлади. У Эрон ва Россия ҳамкорлигини умумий мақсадларни амалга ошириш, шунингдек, минтақада барқарорлик ва ҳамкорликни мустаҳкамлашнинг муҳим омили деб атади.