Нидерландиянинг иродаси Германияни ғалабадан маҳрум этди-видео
Қуйидаги видеода учрашувнинг ажойиб лаҳзаларини томоша қилишингиз мумкин.
Европа Миллатлар лигасининг А дивизионида гуруҳ босқичи амалда якунига етди. Кеча оқшом биринчи гуруҳда плей-оффнинг сўнгги иштирокчиси аниқланди.
Германия майдонига сафар қилган Нидерландия терма жамоаси ўйин сўнгида камбэк намойиш этиб, драматик тарзда ярим финал йўлланмасини қўлга киритди. Гельзенкирхендаги учрашувнинг 9- ва 19-дақиқаларида икки ҳужумчи Тимо Вернер ва Лерой Саненинг голлари эвазига мезбонлар деярли бутун учрашув давомида икки тўп фарқи билан ҳисобда олдинда боришди, аммо сўнгги беш дақиқа ичида вазият тубдан ўзгарди. Дастлаб 85-дақиқада Куинси Промес ҳисобни 2:1 кўринишига келтирди, 90-дақиқада эса жарима майдони марказида бўш қолдирилган меҳмонлар сардори Виржил ван Дейк мувозанатни тиклади.
Натижада нидерландлар очколар ҳисоби бўйича Францияга етиб олди ва ўзаро ўйинлардаги устунлик эвазига гуруҳ ғолиблигини қўлга киритди. Рональд Куман жамоаси сўнгги иккита жаҳон чемпионати ғолибларини ортда қолдиришга муваффақ бўлди.
