80 фоиз францияликлар Макроннинг иқтисодий сиёсатига қарши

Францияда охирги ижтимоий сўров натижаларига кўра, 80-фоиз францияликлар, Франция президентининг ёқилғи нархларини оширишга доир сиёсатларига қарши чиқишмоқда.

Франция ички ишлар вазири Кристоф Кастанер шанба куни бўлиб ўтган намойишларда юз мингдан ортиқ киши иштирок этганини маълум қилди, деб хабар берди Франция ахборот агентлиги. 

“Сариқ нимчалар” ҳаракати Францияда ёнилғи нархи оширилишига қарши норозилик намойишлари ўтказди.  

Кристоф Кастанер шунингдек, намойишлар вақтида 130 киши қўлга олинганини билдирди. “Бугун кўплаб ҳибсга олишлар ўтказилди. Бутун Франция бўйича жами 130 киши қўлга олинди”, деди у.

Францияда 1 январдан бир литр бензин нархи 2,9 евроцентга, дизель нархи 6,5 евроцентга ошади. Europe1 радиостанциясининг маълумотига кўра, 2018 йил давомида дизель ёнилғиси нархи 23%, бензин нархи 15%га ошган.

17 ноябрь куни Франциядаги тартибсизликлар чоғида бир аёл ҳалок бўлгани, 500дан ортиқ киши жароҳатлангани хабар қилинганди. Акцияда бутун мамлакат бўйлаб 283 мингга яқин киши иштирок этган.

Франция ҳукумати 2019 йилда дизель ёнилғиси учун солиқни 6,5 фоизга, бензин солиғини эса 2,9 фоизга оширишни режалаштирмоқда. Ҳукумат ҳайдовчиларнинг транспортнинг экологик турларидан фойдаланишларини рағбатлантириш учун шундай чора кўрмоқда.