Disney инсон кўзига ўхшаш кўзларга эга роботни намойиш этди
Disney компанияси худди инсонникига ўхшаш, бироқ қўрқинчли кўринишдаги кўзга эга роботни намойиш этди, деб хабар беради Hi-Tech.Mail.ru.
Инсонга ўхшаш роботларнинг асосий муаммоларидан бири — бу уларнинг кўзлари. Одамлар худди ҳақиқийдек сунъий терини, сочлар ва бошқа деталларни яратишни ўрганиб олди, бироқ ҳиссиз нигоҳ машинани доим сотиб қўяди. Disney компаниясининг лабораторияси эса ушбу муаммони бартараф этиб, кўзларини бошқарадиган ва уни ҳақиқий одамдек пирпирата оладиган роботни яратди.
Муҳандислар нафақат худди ҳақиқийга ўхшаш кўзни яратган, балки уни кўз қовоғини ҳаракатга келтирадиган майда деталлар тизимига ҳам улаган. Буларнинг барчаси кўзни пирпиратиш ва бошни енгил ҳаракатлантириш билан бирга амалга оширилгани сабаб у ҳақиқийдек кўриниш олган.
Роботнинг кўкрак қисмига махсус камера ўрнатилган бўлиб, у ўзи билан гаплашаётган инсоннинг нигоҳини пайқай олади — бу роботга қайси томонга бурилиш буйруғини беради.
Шу билан бирга, роботнинг ўзи тирик инсон кўринишига эга эмас — у жағ ва кўзлари бор катта чаноққа ўхшайди. Шу сабабли у қўрқинчли кўриниш олган.
Афтидан, Disney мазкур технологиядан келажакда ўзининг кўнгилочар паркларида фойдаланишни режалаштирган кўринади. Шу орқали компания мультфильмлар, фильм ва сериаллардаги қаҳрамонларга ўхшаш роботларни ярата олади.