Коронавирус билан касалланиб чиққанлар эрта қариши мумкинлиги маълум бўлди
Коронавирус билан касалланиб чиқишнинг салбий оқибатларидан бири эрта қариш бўлиши мумкин. «РБК»нинг ёзишича, бу ҳақда Жорж Мэйсон университетининг тизимли биология мактаби профессори Анча Баранова маълум қилди.
«Коронавирус бизнинг қаришимизни яқинлаштиради деб айтган бўлардим. Ресурсларимизни олиб, қариликни яқинлаштиради», — деган у.
Унинг сўзларига кўра, ноябрь ойида бир гуруҳ шифокорлар коронавируснинг енгил ва ўрта даражаси билан касалланган одамларнинг соғлиғи кузатилган тадқиқот натижаларини эълон қилди. Беморларнинг 70 фоизида айрим ички органларининг патологияси аниқланган. Энг кўп учраган ҳолат ёғли гепатоз (жигар яллиғланиши) ва ошқозоности бези тўқималарининг ёғли дегенерацияси бўлган. Биологнинг таъкидлашича, бундай касаллик 60 ёшдаги кишиларга хосдир, аммо коронавирусга чалиниб чиққанлар гуруҳида бу ҳолат 40 ёшдаёқ кузатилган.
Шу билан бирга, Баранова бундай тадқиқот ўтказишни давом эттириш кераклигини, чунки COVID-19 салбий оқибатларининг ҳали ҳаммаси ҳам ўрганилмаганини таъкидлаган.
Аввалроқ америкалик олимлар коронавируснинг асосан нафас олиш тизимига салбий таъсир кўрсатиши ҳақидаги дастлабки тахмин нотўғри бўлиб чиққанини маълум қилганди. Улар инфекция юрак, жигар ва буйрак фаолиятига ҳам сезиларли таъсир кўрсатишини аниқлади. Бундан ташқари, COVID-19 билан касалланиб чиққанларда қоннинг яхши қуюқлашмаслиги, бош оғриғи ва бош айланиши кузатилиши мумкин.
