İran Ordusu ilə SEPAH arasında əməkdaşlıq ən yüksək səviyyəyə çatıb

İran Ordusunun sözçüsü əmir Əkrəminiya Ordunun və SEPAH-ın düşmən qarşısında birgə fəaliyyət göstərdiyini bildirərək, Silahlı Qüvvələr arasında əməkdaşlıq və birliyin hazırda ən yüksək səviyyəyə çatdığını vurğulayıb. Sərdar Möhbi isə Ordunun hazırkı müharibədə İran xalqının və İslam Respublikasının qürur mənbəyi olduğunu deyib.

Sərdar Möhbi görüşdə Ordunun fəaliyyətlərini yüksək qiymətləndirərək bildirib: «Bu günlərdə gedən savaşda Ordu bütün millətin və müqəddəs İslam Respublikası dövlətinin qürurudur. İran tarixində heç vaxt bu qədər güclü, xalq dəstəkli, ideologiyaya sadiq və düşmənə qarşı mübarizə aparan ordu mövcud olmayıb».

O, səkkiz illik müdafiə illərində Ordunun və SEPAH-ın yan-yana vuruşduğunu xatırladaraq qeyd edib: «Şəhid sərdar Səyyad Şirazi Ordunu və SEPAH-ı bir “ilahi diviziya” sayırdı və həmişə bu iki qurumun vəhdətinə xüsusi vurğu edirdi. O dövrdə bir çox əməliyyatlar Orduya məxsus hərbi hava və artilleriya qüvvələrinin dəstəyi ilə həyata keçirilirdi».

Sərdar Möhbi həmçinin vurğulayıb ki, Ordu ilə SEPAH arasında olan bu həmrəylik və birlik — Silahlı Qüvvələr ilə dövlət, dövlət ilə xalq arasındakı birlik — mütləq tarixə yazılmalı və gələcək nəsillərə ötürülməlidir.

Ordu sözçüsü əmir Əkrəminiya isə çıxışında bildirib: «Müdafiə illərində Ordu ilə SEPAH arasında əlaqə, əməkdaşlıq, vəhdət və güc birləşməsi mövcud idi. Bu gün isə bu birlik, əllərin birliyi sayəsində daha da artıb. Hər birimiz Ali Baş Komandirin əmrinə tabeyik və birlikdə millətimizin qüruru üçün mübarizə aparırıq».

O, əlavə edib: «Biz elə düşmənlərin qarşısında dayanmışıq ki, onların silah və texnologiya imkanları o qədər yüksəkdir ki, dünyada heç bir dövlət onlara qarşı bir güllə ata bilmir. Amma biz onların qarşısında dayanmışıq, onlara zərbələr endirmişik və onların məqsədlərinə nail olmasına icazə verməmişik».

Ordu sözçüsü son olaraq qeyd edib ki, bu gün Ordu ilə SEPAH arasındakı əməkdaşlıq özünün ən yüksək səviyyəsindədir və bu, digər qurumlar üçün də nümunə ola bilər. O, vurğulayıb: «Ölkə daxilindəki vəhdət — son qələbənin zəmanətidir». Görüşdə Silahlı Qüvvələrin sözçülərinin birgə iclaslarının davam etdirilməsi və medya əməkdaşlığının gücləndirilməsi yolları da müzakirə edilib.