İsrail rejimi Suriyanın cənubunda təcavüzkar fəaliyyətlərini davam etdirir

İsrail rejiminin hərbçiləri Suriyanın cənubundakı Dəraa ətrafına təxminən 10 hərbi maşınla basqın edərək bir neçə suriyalı gənci saxlayıb; bu addım rejimin bölgədə bufer zonanı işğal etməsi və Suriyanın suverenliyini pozmasının davamı kimi qiymətləndirilir

Məlumat mənbələri İsrail rejimi ordusunun Suriyanın cənubunda təcavüzkar fəaliyyətlərini davam etdirdiyini və bir qrup suriyalı gəncin işğalçı hərbçilər tərəfindən saxlanıldığını bildiriblər.

«Pars Today»in «Əl-Cəzirə»yə istinadən verdiyi xəbərə görə, İsrail rejiminin Suriyanın cənubundakı təcavüzkar addımları davam edir. İsrail hərbçiləri bu gün, bazar ertəsi səhər saatlarında təxminən 10 hərbi maşınla Dəraa şəhərinin qərb ətrafındakı «Abidin» kəndinə basqın edərək bir neçə suriyalı gənci saxlayıblar.

İsrail hərbçiləri bu yaxınlarda bufer zonaya nəzarəti ələ keçirdikdən sonra növbəti hərbi əməliyyat çərçivəsində Dəraanın qərb ətrafına daxil olublar. Suriya xəbər agentliyi «Əl-İxbariyyə» də xəbəri təsdiqləyib, lakin hərbçilərin sayı və saxlanılanların vəziyyəti barədə əlavə məlumat verməyib.

İsrail rejiminin təcavüzkar addımları ilə Suriyanın suverenliyini pozması davam edir. Belə ki, dünən də İsrail hərbi təyyarələrinin bir neçə rayon üzərində uçuşları fonunda hərbçilər Qüneytirə ətrafındakı bir neçə kənddə yoxlamalar aparıblar.

Bundan əlavə, beş İsrail hərbi maşınından ibarət bölmə Qüneytirənin şimalında bir evə basqın edib, «Seyda əl-Culan» kəndində müvəqqəti nəzarət-buraxılış məntəqəsi yaradaraq yoldan keçənləri yoxlayıb. Şənbə günü də yerli mənbələr İsrail rejiminə məxsus səkkiz hərbi maşının Hovz əl-Yərmuk bölgəsinə daxil olduğunu bildiriblər.

Son aylarda İsrail rejiminin Suriyanın cənubundakı hərbi fəallığı mülki şəxslərin saxlanılması, evlərə basqınlar və nəzarət-buraxılış məntəqələrinin yaradılması ilə müşayiət olunur. Bu hərəkətlər Bəşər Əsəd hökumətinin devrilməsindən və İsrail rejiminin 1974-cü il razılaşmasını birtərəfli qaydada ləğv etdiyini elan etməsindən sonra daha da intensivləşib və bufer zonanın işğalı ilə davam edir.