مذاکرات احتمالی «احمد مسعود» با طالبان در تاجیکستان

.بخش تاجیکی خبرگزاری اسپوتنیک از برگزاری مذاکرات احتمالی «احمد مسعود» با دولت موقت طالبان خبر داد

به گزارش رادیو دری، بخش تاجیکی خبرگزاری اسپوتنیک روسیه با استناد به منابع خود اعلام کرد، جبهه مقاومت ملی افغانستان به رهبری «احمد مسعود» قصد دارد کنفرانسی با طالبان در شهر «دوشنبه» پایتخت تاجیکستان برگزار کند.

براساس این گزارش، در حال حاضر تاریخ برگزاری این کنفرانس مشخص نشده است، اما قرار است نمایندگان احزاب سیاسی، روشنفکران، شخصیت‌های عمومی، در مجموع 50 نفر برای مشارکت در آن دعوت شوند.

هدف این کنفرانس یافتن راه حل سیاسی برای بحران کنونی و ایجاد یک حکومت فراگیر با مشارکت همه نیروهای سیاسی در افغانستان عنوان شده است.

این در حالی است که سفارت افغانستان در تاجیکستان اظهار داشت، در مورد برگزاری چنین کنفرانسی اطلاعاتی در اختیار ندارند، زیرا نه نمایندگان جبهه مقاومت ملی و نه نهادهای رسمی در این مورد به آنها اطلاع نداده‌اند.

وزارت امور خارجه تاجیکستان نیز دراین خصوص گفت: نمی‌توانند این اطلاعات را تایید یا تکذیب کنند. با این حال نهاد دیپلماتیک تاجیکستان با خودداری از ارائه جزئیات بیشتر تایید کرده که بررسی این موضوع در حال انجام است.

دوشنبه از دیرباز به عنوان محل مذاکرات طرف‌های درگیر در افغانستان برای آشتی تلقی می‌شد. این موضوع  در سپتامبر سال گذشته بین «امامعلی رحمان» رئیس جمهور تاجیکستان و «عمران خان» نخست وزیر وقت پاکستان بررسی شد.

هر دو کشور در مورد همکاری برای برگزاری مذاکرات میان طالبان و تاجیک‌های افغانستان در دوشنبه توافق کردند، اما تاکنون چنین دیداری در شهر دوشنبه، صورت نگرفته است.

لاوروف: طالبان و طرفداران احمد مسعود مذاکرات را ادامه می دهند