Կան խաղի կանոններ, դրանցով պետք է բոլորս նախապատրաստվենք ընտրություններին. Էդմոն Մարուքյան

Էդմոն Մարուքյանի խոսքով` ընտրությունների նախապատրաստման փուլում նոր Ընտրական օրենսգիրք ընդունելը ոչ միայն հետ կգցի պրոցեսները, այլև ապագա խորհրդարանում մարզային ընդգրկվածությունը կնվազի։

Արտահերթ ընտրությունների նախապատրաստական աշխատանքները պետք է կազմակերպվեն կանխատեսելի և այս պահին գործող օրենսդրությամբ, որպեսզի քաղաքական ուժերը պատրաստվեն ընտրություններին։ Այս մասին լրագրողների հետ ճեպազրույցում հայտնեց «Լուսավոր Հայաստան» կուսակցության ղեկավար Էդմոն Մարուքյանը։

«Նոր ընտրական օրենսգիրքը եթե փորձ արվի ընդունել, ապա դա կարվի 20 օրից մինչև 1 ամիս ընկած ժամանակահատվածում, կնշանակի, որ պրոցեսի ընթացքում խաղի կանոնները կփոխվի։ Դա նույն է, որ ես և դուք շախմատ խաղանք, մեկ էլ` մեկը գնդակով մտնի խաղի մեջ։ Այս փուլում մենք հնարավոր չենք համարում գալ կոնսենսուսի այդ հարցում, իսկ առանց կոնսենսուսի խորհրդարանում ընդունել ընտրական օրենսգիրրք` շատ սխալ բան կլինի։ Կան գործող խաղի կանոններ, և դրանցով պետք է բոլորս նախապատրաստվենք ընտրություններին», – ասաց Մարուքյանը։

Նրա խոսքով` ընտրությունների նախապատրաստման փուլում նոր ընտրական օրենսգիրք ընդունելը ոչ միայն հետ կգցի պրոցեսները, այլև մարզային ընդգրկվածությունը կնվազի ապագա խորհրդարանում։

Մարուքյանը շեշտել է, որ արդար ընտրությունների կազմակերպման համար իշխանությունը պետք է ամեն ինչ անի, որ գումար բաժանողները ձերբակալվեն, հետո էլ դատապարտվեն։ Պետությունը պետք է ամեն ինչ անի, որ ինքը ադմինիստրատիվ ռեսուրս չկիրառի։ Ընդիմությունն էլ իր հերթին պետք է հսկի այդ գործընթացը, որպեսզի ընտրություններն արդար անցնեն։

Հիշեցնենք` երեկ` մարտի 18–ին, «Բարգավաճ Հայաստան» խմբակցության ղեկավար Գագիկ Ծառուկյանի հետ հանդիպումից հետո ՀՀ վարչապետ Նիկոլ Փաշինյանը հայտնեց, որ ամռանը` սույն թվականի հունիսի 20-ին, Հայաստանի Հանրապետությունում կանցկացվեն արտահերթ խորհրդարանական ընտրություններ ԱԺ արտահերթ ընտրություններ։

Նշենք, որ Սահմանադրության 93–րդ հոդվածի համաձայն` Ազգային ժողովի հերթական և արտահերթ ընտրությունները նշանակում է ՀՀ նախագահը: Արտահերթ ընտրությունն անցկացվում է ԱԺ–ի արձակվելուց ոչ շուտ, քան երեսուն, և ոչ ուշ, քան քառասունհինգ օր հետո: Ռազմական կամ արտակարգ դրության ժամանակ Ազգային ժողովի ընտրություն չի անցկացվում:

armeniasputnik.am

Հայերեն ռադիոալիքին հետևեք սոցցանցերում

https://www.instagram.com/parstodayarmenian/
https://twitter.com/radio_armenian
https://www.reddit.com/user/armradio/
https://urmedium.com/c/armenianradio