Վերջին շաբաթների ընթացքում կորոնավիրուսի դեպքերի կայուն նվազում է նկատվում

Վերջին շաբաթների ընթացքում կորոնավիրուսի դեպքերի կայուն նվազում է նկատվում: Կառավարության նիստին այս մասին ասաց Առողջապահության նախարար Անահիտ Ավանեսյանը:

«Երեկ թեստավորվել է  4759 քաղաքացի, նոր դեպքերը 946 են, ունենք 24 մահ: Այս պահին Հայաստանում շրջանառվում են «Օմիկրոն»-ի BA.1 և BA.2 ենթաշտամները: Ամեն շաբաթ ընտրանքային հետազոտություններ ենք իրականացնում  և, կարծես,  «Դելտա»  շտամը իսպառ դուրս է մղվել «Օմիկրոն» շտամի ազդեցության ներքո»,- նշեց Ավանեսյանը՝ հավելելով, որ «Օմիկրոն» շտամով վարակվելու դեպքում քաղաքացիները ավելի հեշտ են հաղթահարում վիրուսը,  բայց, միևնույն է, գրանցվել են մահվան դեպքեր:

Նախարարն  անհրաժեշտ է համարում զգոնությունը պահպանելը և հատկապես տարեց քաղաքացիների և խրոնիկ հիվանդություններ ունեցող քաղաքացիների պատվաստումները օր առաջ կազմակերպելը:

Նախարարի խոսքով` առաջիկայում հիվանդանոցներում կմեկնարկի մահճակալների կրճատման գործընթաց:

yerevanlur.am/