Ղազախստանը վավերացրել է Հայաստանի հետ նավթամթերքների մատակարարման պայմանագիրը

Ղազախստանի նախագահ Քասիմ Ժոմարտ Տոկաևն օրենք է ստորագրել Հայաստանի հետ միջկառավարական համաձայնագրի վավերացման մասին: Այն վերաբերում է նավթամթերքների մատակարարման ոլորտում առևտրատնտեսական համագործակցությանը։ Ինչպես գրում է 1prime.ru-ն, այս մասին հայտնել է պետության ղեկավարի մամուլի ծառայությունը։

Հայաստանի հետ համաձայնագիրը ստորագրվել է 2020 թվականի հուլիսին Նուր Սուլթանում։ Այն սահմանում է երկու երկրների կառավարությունների միջև առևտրատնտեսական համագործակցության պայմանները՝ Եվրասիական տնտեսական միության (ԵԱՏՄ) արտաքին տնտեսական գործունեության ապրանքային անվանացանկի 27-րդ խմբին դասված ապրանքների մատակարարման համար, բացառությամբ նավթի, էլեկտրաէներգիայի, բնական գազի և ածխի։

Համաձայնագրով նախատեսվում է ներքին սպառման համար Ղազախստանից Հայաստան մատակարարվող ապրանքների արտահանման մաքսատուրքերը չգանձել ինդիկատիվ մնացորդներով նախատեսված ծավալներով։ Սահմանվել է ցուցակով չհաստատված և ինդիկատիվ հաշվեկշիռներով չնախատեսված նշված ապրանքների մատակարարման արգելք։

Ղազախստանից Հայաստան մատակարարվող նշված ապրանքները ենթակա չեն արտահանման երրորդ երկրներ և ԵԱՏՄ այլ երկրներ։ Այս պարտավորության խախտման փաստերի բացահայտման դեպքում ղազախական կողմն իրեն իրավունք է վերապահում արգելել կամ կասեցնել այդ ապրանքների անմաքս մատակարարումները։

tert.am