Հայաստանը ճակատագրական փուլ է ապրում. Աննա Գրիգորյան
Նոյեմբերի 5-ի հանրահավաքը ուղղված կլինի արտաքին ուժերին՝ ե՛ւ գործընկերներին, ե՛ւ թշնամիներին։ Այս մասին NEWS․am-ի հետ զրույցում ասաց «Հայաստան» խմբակցության պատգամավոր Աննա Գրիգորյանը։
Նա պարզաբանեց, որ հանրահավաքի ժամանակ պետք է ֆիքսել, որ ԼՂ կարգավիճակի հարցը դեռ պետք է լուծում ստանա։ Նրա գնահատմամբ՝ հանրահավաքը հայի հանրահավաք է՝ անկախ նրա քաղաքական հայացքներից, եւ այդ օրը յուրաքանչյուր հայ պետք է գա եւ վճռորոշ խոսք ասի պետականության պահպանման եւ ԼՂ ժողովրդին աջակցության մասին։
Գրիգորյանը հավելեց, որ Ղարաբաղի ժողովուրդը դուրս է եկել փողոց, քանի որ բախվել է էքզիստենցիալ սպառնալիքի, եւ Հայաստանի հանրությունը չպետք է անտարբերություն դրսեւորի։ Հանրությունը պետեք է աջակցի Ղարաբաղին եւ անի ամեն ինչ, որպեսզի Ղարաբաղը երբեք չլինի Ադրբեջանի մաս, քանի որ դա կստեղծի էթնիկ զտման սպառնալիք։
Նրա խոսքով՝ Հայաստանը ճակատագրական փուլ է ապրում, իսկ ՀՀ վարչապետին, ինչպես հիշեցրեց Գրիգորյանը, ոչ ոք իրավունք չի տվել Ադրբեջանին հանձնել Ղարաբաղը։ «Պետք է հստակ ազդանշան ուղարկել, որ նա մանդատ չունի նման քայլերի համար։ Պետք է ամբողջ աշխարհին ապացուցել, որ Փաշինյանն ամբողջ Հայաստանը չէ։ Սա հերթական հանրահավաքը չէ, սա ընդդիմության կամ իշխանության հավաքը չէ։ Հայաստանն ինքը պետք է որոշի՝ ինչպիսին պետք է լինի իր երկիրը։ Մենք չենք ընդունի Փաշինյանի քայլերը, որը երկիրը կործաննման է տանում»,-ասաց Գրիգորյանը։
Պատգամավորը խոստովանեց, որ հանրության մի մասն անտարբեր է դարձել եւ չգիտի՝ ում հավատալ, ում՝ ոչ։ «Բայց մենք չենք ասում, որ պետք է ինչ-որ մեկին հավատալ կամ չհավատալ, սա պայքար է հանուն հայրենիքի, այլ ոչ թե հանուն ինչ-որ անհատի»,-հավելեց Գրիգորյանը։
Նրա պնդմամբ՝ քաղաքացիները պետք է իրենց աջակցությունը հայտնեն ՀՀ տարաքծային ամբողջականությանը եւ թույլ չտան, որ Ղարաբաղը դառնա Ադրբեջանի մաս։
Հիշեցնենք, որ նոյեմբերի 5-ին՝ ժամը 15:00-ին Երեւանի Ֆրանսիայի հրապարակում տեղի կունենան Դիմադրություն շարժման համազգային հանրահավաքը։
news.am
