Փաշինյանը Հայաստանում կրկնում է Սահակաշվիլիի և Զելենսկու սցենարը. Տիգրան Քոչարյան
Հայ ժողովրդին թշնամու առջև մեն-մենակ է թողել Նիկոլ Փաշինյանի իշխանությունը և շարունակում է դա անել իր ժամանակին նախագծված հակառուսական ճանապարհային քարտեզով: Այս մասին լրագրողների հետ զրույցում հայտնեց մեդիափորձագետ Տիգրան Քոչարյանը:
«ՀՀ-ն ամեն ինչ անում է, որ Ռուսաստանը ոչ միայն դադարի լինել ՀՀ դաշնակիցը, այլ նաև տարբեր քայլերով թշնամացնում է Ռուսաստանին: Փաշինյանը Հայաստանում կրկնում է Սահակաշվիլիի և Զելենսկու սցենարը»,- ընդգծեց մեդիափորձագետը:
Tert.am-ի հարցին այն մասին, որ ռուսական կողմի արձագանքներն այս պահին դեռ սահմանափակվում են հայտարարություններով, ի՞նչ կլինի, եթե Ռուսաստանի արձագանքն ավելի կոշտ լինի, Քոչարյանը պատասխանեց.
«Ռուսաստանը կարող է ավելի կոշտ քայլերի գնալ և կարող է ընդհանրապես ոչինչ չանել՝ երկու տարբերակներն էլ Հայաստանի համար կործանարար են: Հայաստանը, մերժելով Ռուսաստանի հետ անվտանգային ճարտարապետությունը, ձեռք չի բերում այլ երկրների հետ նույն երաշխիքները և փաստացի միայնակ է մնում թուրք-ադրբեջանական տանդեմի դեմ, որն արդեն Հայաստանի տարածքում կկարողանա անել այն ամենն, ինչ ցանկանա»:
Ըստ նրա՝ հայ-ֆրանսիական հարաբերությունների բարելավումն անվտանգային տեսանկյունից մեզ ոչինչ չի տալիս, որովհետև այն զենքերը, որը Ֆրանսիան տրամադրում է մեզ այս պահին, պատերազմական իրավիճակում այդքան էլ օգտավետ չեն լինի իրենց սակավության և մեր ընդհանուր պաշտպանական համակարգի մեջ ինտեգրված չլինելու պատճառով:
«Արդյո՞ք Ֆրանսիան պատրաստ է գալ և հայտնվել մի տարածաշրջանում, որտեղ իրեն տարբեր պատճառներով չեն սիրում Հայաստանի հարևաններից երեքը + Ռուսաստանը: Եթե Ռուսաստանը, Իրանը, Թուրքիան և Ադրբեջանը չեն ընդունում Ֆրանսիայի ներկայությունն այստեղ, ապա կարող է կրկնվել այն, ինչ կրկնվեց հայկական Կիլիկիայում 1918-1921թթ, երբ Ֆրանսիան ստացավ մանդատ և բարեհաջող 21թ-ին դուրս եկավ հայերին թողնելով մենակ թուրքերի առջև: Հիմա Ֆրանսիայի տակ գտնվող միայն մեկ հայկական Վագիֆլի գյուղն է: Արդյո՞ք այս անգամ կկրկնվի «Մուսա լեռան 40 օրը», երբ ֆրանսիական նավն ուղղակի կգա փրկելու ապրող հայերին»,- եզրափակեց Քոչարյանը:
https://www.tert.am/am/news/2024/04/01/tigran-kocharyan/4102059
