Բաքուն համաձայնել է, որ ՀՀ–ի և Ադրբեջանի արտգործնախարարները հանդիպեն Ղազախստանում. Ալիև
Ադրբեջանական կողմը համաձայնել է, որ Հայաստանի և Ադրբեջանի արտգործնախարարները` Արարատ Միրզոյանն ու Ջեյհուն Բայրամովը, հանդիպեն Ղազախստանում։ Ինչպես հայտնում է ՏԱՍՍ–ը, այդ մասին հայտարարել է Ադրբեջանի նախագահ Իլհամ Ալիևը։
Ղազախստանի նախագահ Կասիմ–Ժոմարտ Տոկաևը ապրիլի 15-ին Երևանում հայտարարել էր, որ Աստանան պատրաստ է առավելագույն աջակցություն ցուցաբերել Երևանի և Բաքվի միջև խաղաղության համաձայնագրի հարցում և հարթակ տրամադրել երկու երկրների միջև բանակցությունների համար։
«Ղազախստանը դիմել էր մեզ` առաջարկելով Ադրբեջանի և Հայաստանի արտգործնախարարների հանդիպում անցկացնել այնտեղ, և մենք համաձայնեցինք։ Եթե Հայաստանը նույնպես համաձայնի, ապա հանդիպումը կկայանա Ղազախստանում», - ասել է Ալիևը Բաքվում կայացած միջազգային համաժողովում։
Ադրբեջանի նախագահը նշել է, որ Ղազախստանը միջնորդ չէ, այլ միայն հարթակ է տրամադրում Ադրբեջանի և Հայաստանի բանակցությունների համար։
Նա ընդգծել է, որ կողմերն ավելի քան երբևէ մոտ են խաղաղության համաձայնագրի ստորագրմանը։
«Մեզ պետք է միայն մանրամասները մշակել, սակայն, իհարկե, երկու կողմերին էլ ժամանակ է պետք»,- հավելել է Ադրբեջանի նախագահը։
Ադրբեջանի նախագահի խոսքով՝ տարածաշրջանում գործընթացները զարգանում են դրական ուղղությամբ՝ լինի դա Բաքվի և Երևանի հարաբերությունների կարգավորումը, թե ադրբեջանա-հայկական սահմանի զատումը։
Հիշեցնենք` Միրզոյան–Բայրամով վերջին հանդիպումը կայացել է փետրվարի 28-29–ը Գերմանիայի մայրաքաղաք Բեռլինում։ Ըստ պաշտոնական հաղորդագրության` կողմերը պայմանավորվել են շարունակել խաղաղության պայմանագրի շուրջ բանակցությունները։