Բաքվի հետ բանակցում ենք տարածքային ամբողջականության փոխադարձ ճանաչման շուրջ․ Սիմոնյան
Հայաստանի և Ադրբեջանի միջև տարածքային ամբողջականության փոխադարձ ճանաչման շուրջ բանակցությունները շարունակվում են: Այս մասին Լյուքսեմբուրգի Պատգամավորների պալատի նախագահ Կլոդ Վիզլերի հետ համատեղ մամուլի ասուլիսի ժամանակ ասաց ՀՀ ԱԺ նախագահ Ալեն Սիմոնյանը՝ պատասխանելով լրագրողների հարցերին:
Նրա խոսքով՝ ադրբեջանական կողմից, նաև ամենաբարձր մակարդակով` Ալմա Աթայի հռչակագրի հիշատակմամբ, մի քանի հայտարարություններ կան: Խաղաղության պայմանագրի շուրջ բանակցությունների շրջանակներում տարածքային ամբողջականության փոխադարձ ճանաչման մասին խոսակցությունը շարունակվում է։
«Սա այս փուլում քննարկվող թեմաներից մեկն է։ Բայց մենք դեռ համաձայնություն չունենք, և քննարկումները շարունակվում են»,- ասաց Սիմոնյանը։
Ինչ վերաբերում է տարածաշրջանում հաղորդակցությունների բացմանը, ապա Հայաստանը հավատարիմ է նախկինում հայտարարված սկզբունքներին և Ադրբեջանի հետ բանակցում է հնչեցված դիրքորոշման տրամաբանությանը համապատասխան։
«Երևանը պատրաստ է շարունակել այդ քննարկումները մյուս բոլոր մակարդակներում։ Ոչ միայն խաղաղության պայմանագրի շրջանակներում։ Մենք կարևորում ենք բոլոր կոմունիկացիաների բացման գաղափարը, որն արտացոլված է նաև 2020 թվականի նոյեմբերի 9-ի եռակողմ հայտարարության մեջ, Հայաստանը շարունակում է այդ ուղղությամբ աշխատանքները»,- նշեց Սիմոնյանը։
Նա հույս հայտնեց, որ այդ աշխատանքը հաջողությամբ կավարտվի։
Ավելի վաղ Սիմոնյանը հայտարարել էր, որ Իլհամ Ալիևի հայտարարությունները Տավուշում սահմանազատման վերաբերյալ, որտեղ նա պնդում է Բաքվի հերթական հաղթանակի մասին, ներքին լսարանի համար են:
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվեցին սահմանազատումը սկսել Տավուշի մարզից։ Հայտարարվեց, որ սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարեց, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
ՀՀ ԱԳՆ–ն մայիսի 15-ին հայտնեց, որ Հայաստանի և Ադրբեջանի սահմանազատման հանձնաժողովները նոր պայմանավորվածություններ են ձեռք բերել։ ՀՀ վարչապետի աշխատակազմը պարզաբանեց, որ, ըստ այդ պայմանավորվածությունների, Կիրանցում ճանապարհի տեղափոխման ու գույքային խնդիր է առաջանալու, և կառավարության ներկայացուցիչները գույքագրելու են հնարավոր խնդիրները, որպեսզի փոխհատուցեն քաղաքացիների կրած վնասները։
