Հայաստանի և Ադրբեջանի միջև չի լինելու պատերազմ, լինելու է խաղաղություն․ Փաշինյան

«Իմ համոզմունքն այն է, որ ի հեճուկս բոլոր փաստարկների, բոլոր սադրանքների և այլնի՝ Հայաստանի և Ադրբեջանի միջև չի լինելու պատերազմ, լինելու է խաղաղություն, և դա շատ միանշանակ է ինձ համար»,- հայտարարեց Փաշինյանը։

Նրա խոսքով՝ Երևանը վճռական է տրամադրված և հանձնառու է խաղաղության օրակարգին։ Հայաստանը պատրաստ է շարունակել խորհրդակցություններն Ադրբեջանի հետ՝ հասնելու խաղաղության պայմանագրի և այլ փաստաթղթերի ստորագրմանը, որոնք ամբողջովին և կտրուկ կփոխեն իրավիճակը և տարածաշրջանի ժողովուրդների ճակատագիրը։

Փաշինյանը համաժողովի մասնակիցներին ներկայացրեց ՀՀ կառավարության մշակած «Խաղաղության խաչմերուկ» նախագիծը, այն առաջարկները, որը Երևանն արել է Բաքվին՝ տարածաշրջանային հաղորդակցության ուղիների ապաշրջափակման համար։

Վարչապետը նաև խոսեց այն մասին, որ Ադրբեջանի կողմից պարբերաբար խոսվում է «արևմտյան Ադրբեջանի» մասին և շեշտեց, որ չկա ու չի կարող լինել «Արևմտյան Ադրբեջան» Հայաստանի ինքնիշխան տարածքում։ Ընդգծեց՝ «արևմտյան Ադրբեջանն» Ադրբեջանի արևմտյան շրջաններն են, և այդ տարածքից դուրս չի կարող լինել։

«Դրա քննարկումը մեզ համար բացառված է, և ես կարծում եմ, որ դա իրավաչափ դիրքորոշում է»,- ասաց Փաշինյանը։

 

Sputnik