Հայաստանը պատրաստ է ՌԴ-ի և Ղազախստանի հետ համագործակցել վերականգնվող էներգիայի ոլորտում
Նախարարն ընդգծել է Հայաստանի պատրաստակամությունը ընդլայնել համագործակցությունը վերականգնվող էներգիայի աղբյուրների, ջրածնային տեխնոլոգիաների և էներգաարդյունավետ լուծումների ոլորտում
Հայաստանը պատրաստ է Ռուսաստանի, Ղազախստանի և Ղրղզստանի հետ համագործակցել վերականգնվող էներգիայի և ջրածնային տեխնոլոգիաների ոլորտում։ Այս մասին Ղազախստանի Հանրապետությունում անցկացվող «Աստանա» միջազգային համաժողովի ընթացքում հայտարարել է ՀՀ էկոնոմիկայի նախարար Գևորգ Պապոյանը։
Պապոյանը բարձր է գնահատել ՀՀ նորարարությունն ու մարդկային կապիտալը՝ նշելով, որ Հայաստանը ներդրումներ է կատարում տեղեկատվական տեխնոլոգիաների, կրթության, գիտության ոլորտներում։
«Հայաստանը տարածաշրջանային գործընկերության մեջ եղել է, կա և կշարունակի հավատարիմ մնալ փոխշահավետ հարաբերություններ ձևավորելու ռազմավարությանը, և այսօր, երբ շահերի և հնարավորությունների համաշխարհային քարտեզը փոփոխվում է, Եվրասիան պետք է դառնա ստեղծարարության և վստահության տարածք։ Մենք պատրաստ ենք լինել այս ապագայի մի մասը՝ ենթակառուցվածքների, տեխնոլոգիաների և վստահության քաղաքականության հարցում», - նշել է նախարարը։
Պատասխանելով այն հարցին, թե ո՞ր ոլորտներում Հայաստանն այսօր ունի ամենամեծ ներուժը Եվրասիական տարածաշրջանում հարևանների հետ համագործակցությունը խորացնելու համար՝ Գևորգ Պապոյանը առանձնացրել է ենթակառուցվածքային ինտեգրումը, էներգետիկան և կայուն փոխակերպումը՝ ընդգծելով Հայաստանի պատրաստակամությունը ընդլայնել համագործակցությունը վերականգնվող էներգիայի աղբյուրների, ջրածնային տեխնոլոգիաների և էներգաարդյունավետ լուծումների ոլորտում, նորարարությունն ու մարդկային կապիտալը։
Քննարկմանը մասնակցել են ՌԴ փոխվարչապետ Ալեքսեյ Օվերչուկը, տնտեսագիտության ոլորտում նոբելյան մրցանակակիր Ռայե Կվոն Չուն, Ղրղզստանի էկոնոմիկայի նախարար Բակիտ Սիդիկով, Լոնդոնի ֆոնդային բորսայում Իսլամական ֆինանսների ղեկավար Մուստաֆա Ադիլը, Ղազախստանի ազգային էկոնոմիկայի նախարարի տեղակալ Արման Կասինովը և «Մասդարի» ԱՊՀ տնօրեն Աբդուլլահ Զայեդը։