ՀՀ—Իրան էլեկտրահաղորդման նոր գծի կառուցման աշխատանքներն ավարտական փուլում են. ՏԿԵՆ նախարար
Իրան-Հայաստան էլեկտրահաղորդման նոր գծի կառուցման աշխատանքները գտնվում են ավարտական փուլում։ Լրագրողների հետ զրույցում ասել է ՀՀ տարածքային կառավարման և ենթակառուցվածքների նախարար Դավիթ Խուդաթյանը՝ հավելելով, որ բարձրավոլտ էլեկտրահաղորդման գիծը հնարավորություն կստեղծի Հայաստանից Իրան արտահանվող էլեկտրաէներգիայի ծավալները կրկնապատկել (ըստ ծրագրի՝ արտահանումը 350 ՄՎտ-ից կբարձրանա մինչև 1200 ՄՎտ-խմբ.)։
«Արդեն ավարտական փուլում են գտնվում Իրան-Հայաստան էլեկտրահաղորդման նոր գծի կառուցման աշխատանքները, ինչը հնարավորություն կտա ավելի մեծ ծավալով էլեկտրաէներգիա արտահանել Իրան։ Իրանն ու Հայաստանը շարունակում են աշխատանքն այս ծրագրի հաջող ավարտն ապահովելու ուղղությամբ»,– ասել է Խուդաթյանը։
Նախարարը հիշեցրել է, որ ՀՀ–ից Իրան այսօր էլ էլեկտրաէներգիա արտահանվում է։
Հիշեցնենք, որ օգոստոսի 14–ի կառավարության նիստում Իրան–ՀՀ բարձրավոլտ գծի համար ՀԱԷԿ–ի 2-րդ էներգաբլոկի ծրագրից 1 մլրդ 35 մլն դրամ կրճատվեց ու տրամադրվեց ՀՀ–Իրան էլեկտրաէներգիայի փոխանակման հզորության ավելացման ծրագրին։