TRIPP-ի տրամաբանությունն ընդհանրապես միջանցքային չէ. Սարգիս Խանդանյան
TRIPP-ի շրջանակում անվտանգային բոլոր հարցերը լուծելու են հայ իրավապահները:
Այդ մասին խորհրդարանական ճեպազրույցի ժամանակ ասել է Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանը՝ լրագրողների խնդրանքով անդրադառնալով տեղեկություններին, թե Ադրբեջանի պահանջով TRIPP-ի տարածքում հայ-սահմանապահների ներկայություն չի լինելու։
Սարգիս Խանդանյանը պատասխանել է նաև հարցին, թե արդյոք Ռուսաստանի հետ պայմանավորվածություններ ձեռք կբերվե՞ն նախատեսվող ճանապարհի վերաբերյալ:
«TRIPP զարգացման ընկերությունում երրորդ կողմերի ներգրավածությունը՝ լինեն մասնավոր թե պետական ընկերություններ, դրանց ներգրավվածության հարցերը որոշվելու են Հայաստանի և Միացյալ Նահանգների փոխադարձ համաձայնությամբ»,- ասել է նա:
Հարցին՝ ինչո՞ւ է Ալիևն ասում, թե դա «Զանգեզուրի միջանցք» է, Խանդանյանը պատասխանեց. «Կարծում եմ, որ դա հարգալից չէ ԱՄՆ-ի նկատմամբ, որովհետև Հայաստանի այդ ստեղծվելիք ենթակառուցվածքը, նախագիծն ունի հստակ անուն, միջազգային լեգիտիմություն ունեցող անուն: Հորդորում եմ՝ մեր բոլոր գործընկերներին օգտագործել TRIPP անվանումը:
Իսկ տրամաբանությունը, ինչպես փաստաթուղթն է հաղորդում բոլորին՝ հարևաններին, հեռու բարեկամներին, հայաստանյան ընդդիմությանը, շահագրգիռ կողմերին, ընդհանրապես միջանցքային չէ»:
