ՀՀ ՆԳՆ-ն առաջարկում է թույլատրել դատավարությունների անցկացումը տեսակապի միջոցով
Հայաստանի ներքին գործերի նախարարությունն առաջարկում է թույլատրել դատական գործընթացների անցկացումը տեսակապի միջոցով։
Դրա մասին հունիսի 16-ին Ազգային ժողովի նիստում, Քրեական դատավարության օրենսգրքում լրացումներ և հարակից օրենքներում փոփոխություններ կատարելու մասին օրինագծերի փաթեթի քննարկման ժամանակ, հայտարարել է հանրապետության ներքին գործերի նախարար Արփինե Սարգսյանը։
«Տեսակապի կիրառումը կարող է առաջարկել ինչպես մեղադրյալը, այնպես էլ հենց դատարանը։ Դրա համար պետք է լինեն անհրաժեշտ հիմքեր։ Օրինակ՝ եթե դա անհրաժեշտ է հասարակական կարգի, առողջության պահպանման, դատավարության մասնակիցների պաշտպանության, հանցագործությունների կանխարգելման և նիստերը ողջամիտ ժամկետներում անցկացնելու համար»,- պարզաբանել է Սարգսյանը։
Ըստ նրա՝ նման նիստերին փաստաբանի ներկայությունը պարտադիր է։
Ըստ նախագծի՝ փաստաբանը նիստին նույնպես տեսակապի միջոցով կմասնակցի՝ գտնվելով այնտեղ, որտեղ մեղադրյալն է։ Բացառություն կկազմեն այն դեպքերը, երբ մեղադրյալը համաձայն կլինի դատարանի դահլիճում փաստաբանի ներկայությանը։
Նախարարը հավելել է, որ մեղադրյալներին դատարանի դահլիճ տեղափոխելու համար բավականին շատ ռեսուրսներ են ծախսվում։ Հետևաբար, տեսակապը կարող է կիրառվել նաև այս դեպքերում։
