Ընտրակաշառքի մեղադրանքներ Հայաստանում․ իշխող կուսակցությունը ցանկանում է փոխել ընտրական օրենսդրությունը
Հայաստանի իշխող «Քաղաքացիական պայմանագիր» կուսակցությունը վերջին խորհրդարանական ընտրություններում իր ձայների մասնաբաժնի նվազումից հետո, ընդդիմադիր ուժերին մեղադրում է ընտրակաշառք բաժանելու մեջ և փորձում է մշակել նոր օրենքներ՝ սահմանափակելու և քաղաքականապես դուրս մղելու ընդդիմադիր մրցակիցներին։
Այս քայլը մտահոգություններ է առաջացրել երկրում քաղաքական մրցակցության ապագայի և ժողովրդավարական գործընթացների վերաբերյալ։
Հղում անելով Tasnim գործակալությանը՝Pars Today-ը հաղորդում է, որ ըստ կառավարության մոտ կանգնած պաշտոնյաների՝ ընդդիմադիր կուսակցությունների ձայները ձեռք են բերվել ընտրակաշառքի միջոցով։ Սակայն իշխող կուսակցությունը մինչ այժմ չի պահանջել ընտրությունների արդյունքների չեղարկում և ընդգծում է իր հաղթանակի լեգիտիմությունը։ Խորհրդարանի փոխնախագահ Ռուբեն Ռուբինյանը հայտարարել է, որ նոր կառավարությունը ձևավորվել է օրինական ձայների հիման վրա, սակայն ընտրախախտում կատարած կուսակցությունները պետք է ի սկզբանե դուրս մնային ընտրական մրցակցությունից։
Պաշտոնական արդյունքների համաձայն՝ «Քաղաքացիական պայմանագիր» կուսակցությունը, չնայած 2021 թվականի համեմատ ձայների թվի աճին, տոկոսային առումով արձանագրել է նկատելի անկում՝ իր մասնաբաժինը 54 տոկոսից նվազեցնելով մինչև 50 տոկոսից պակաս։ Մինչդեռ ընդդիմադիր կուսակցություններն ու դաշինքները՝ Ռոբերտ Քոչարյանի և Սամվել Կարապետյանի նման գործիչների ղեկավարությամբ, արձանագրել են հանրային աջակցության զգալի աճ։
Միաժամանակ իշխող կուսակցությունը քննարկում է ընտրակաշառքի համար պատիժների խստացման, որոշ ընտրական իրավունքների սահմանափակման և ընդդիմադիր քաղաքական ուժերի նկատմամբ ավելի խիստ կանոնների կիրառման նախագծեր։ Նման քայլերը, դիտորդների կարծիքով, կարող են խորացնել քաղաքական լարվածությունը և ընդլայնել իշխանության ու ընդդիմության միջև առկա ճեղքը Հայաստանում։