ՀՀ կառավարությունը հաստատեց մինչև 2031 թ. ծրագիրը
ՀՀ կառավարությունը մտադիր է պաշտոնականացնել խաղաղությունը Ադրբեջանի հետ, բարելավել հարաբերությունները Թուրքիայի հետ, զարգացնել ռազմավարական կապերը ԵՄ-ի, ԱՄՆ-ի, Իրանի, Վրաստանի և բազմակողմանի կապերը Ռուսաստանի հետ։
Այս մասին նշված է ՀՀ կառավարության 2026-2031 թվականների ծրագրում, որը կառավարության նիստում ներկայացրել է ՀՀ վարչապետ Նիկոլ Փաշինյանը և որը շուտով կներկայացվի ԱԺ–ի հաստատմանը։
Արտաքին քաղաքականության բաժնում նշվում է, որ կառավարությունը կշարունակի աշխատել Ադրբեջանի հետ սահմանազատման, ինչպես նաև խաղաղության ինստիտուցիոնալացման (այսինքն՝ խաղաղության պայմանագրի և այլ իրավական ակտերի ստորագրման) ուղղությամբ, ինչպես նաև ակտիվացնել երկու երկրների քաղաքացիական հասարակության և գործարար համայնքների միջև շփումները։
Կառավարությունը մտադիր է նաև դիվանագիտական հարաբերություններ հաստատել Թուրքիայի հետ և բացել սահմանը՝ առնվազն երկու անցակետերով (որոնցից դեռ մեկն է պատրաստ հայկական կողմում՝ Արմավիրի մարզի Մարգարա անցակետը), ինչպես նաև վերագործարկել էներգետիկ ենթակառուցվածքները։
Իրանի հետ նախատեսվում է խորացնել ռազմավարական հարաբերությունները, պահպանել քաղաքական երկխոսությունը և ամրապնդել տնտեսական կապերը, հատկապես` էներգետիկայի ոլորտում։
Նշվում են նաև Պարսից ծոց-Սև ծով տրանսպորտային միջանցքի զարգացման ծրագրերը։ Վրաստանի հետ հարաբերությունների վերաբերյալ խոսվում է 2024 թվականի հունվարին ստորագրված ռազմավարական գործընկերության հռչակագրի իրականացման մասին, որը համագործակցություն է նախատեսում տարբեր ոլորտներում։
Խոսվում է նաև Եվրամիության և Միացյալ Նահանգների հետ ռազմավարական գործընկերության խորացման մասին։ ԵՄ-ի հետ նախատեսվում է շարունակել աշխատանքները «Ընդլայնված և համապարփակ գործընկերության մասին համաձայնագրի» իրականացման, ինչպես նաև 2025 թվականին ընդունված «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի հիման վրա ԵՄ տնտեսական, իրավական և սոցիալական չափանիշներին համապատասխանության բարձրացման ուղղությամբ։ Նախատեսվում է նաև ավարտին հասցնել ԵՄ մուտքի արտոնագրերի ազատականացման գործընթացը։
ԱՄՆ–ի մասով նախատեսվում է իրականացնել TRIPP նախագիծը առնվազն երկաթուղիների և էներգետիկ ենթակառուցվածքների հետ կապված, ինչպես նաև զարգացնել համագործակցությունը՝ հիմնվելով 2025 թվականի օգոստոսին երկու կառավարությունների միջև ստորագրված հուշագրերի վրա: Հատուկ նշվում է Ֆրանսիայի հետ ռազմավարական գործընկերության խորացման և որակական նոր մակարդակի բարձրացնելու մասին։
Կառավարության ծրագրում նաև խոսվում է խաղաղության նոր պայմաններում Ռուսաստանի հետ բազմոլորտ ու փոխշահավետ գործընկերության (որը ռազմավարական չի որակվել) վերափոխման և խորացման մասին տարածաշրջանում: Եվրասիական միության վերաբերյալ ընդգծվում է միության հիմնարար սկզբունքների, այսինքն՝ կապիտալի, ապրանքների, ծառայությունների և աշխատուժի ազատ տեղաշարժի արդյունավետ կիրառման անհրաժեշտությունը։
Ծրագրում նշվում է Չինաստանի հետ ռազմավարական գործընկերությունը, Հնդկաստանի հետ գործընկերությունը ամրապնդելու և Մերձավոր Արևելքի երկրների հետ հարաբերությունները զարգացնելու մտադրությունը։
Զինված ուժերի վերաբերյալ նշվում է, որ դրանք չեն կիրառվելու Հայաստանի միջազգայնորեն ճանաչված սահմաններից դուրս (բացառությամբ միջազգային պայմանագրերի հիման վրա միջազգային խաղաղապահ առաքելություններում ներգրավման): Կշարունակվի արհեստավարժ բանակի անցման քաղաքականությունը: Կշարունակվի Զինված ուժերի պահեստազորի ամրապնդման և սահմանապահ զորքերի կողմից սահմանների պաշտպանության աստիճանական անցման գործընթացը։ Կընդլայնվեն նոր կենսաչափական անձնագրերով սահմանը հատելու հնարավորությունները։
Ազգային անվտանգության համատեքստում նախատեսվում է նաև ընդլայնել պարենային պաշարները՝ դրանց դիվերսիֆիկացմամբ և կոնկրետ մատակարարներից կախվածության նվազեցմամբ։
Ծրագիրը ներառում է նաև «Հոգևոր անվտանգություն» բաժինը, որում խոսվում է Հայաստանյայց Սուրբ առաքելական եկեղեցին հիբրիդային պատերազմի գործիքի վերածելու արտաքին ուժերի փորձերը խափանելու, ինչպես նաև «եկեղեցու փաստացի պետին» (նկատի ունենալով Գարեգին Բ կաթողիկոսին) հեռացնելու (հանգստի կոչել) միջոցով եկեղեցու բարեկարգման մասին։ Խոսվում է նաև եկեղեցու կանոնադրության ընդունման անհրաժեշտության մասին, որը պետք է ամրագրի ՀԱԵ ֆինանսական թափանցիկությունը և հոգևորականների բարեվարքության կանոնները։
