Իրան-Հայաստան համագործակցությունը` տրանսպորտի և տրանսպորտային ենթակառուցվածքների ոլորտում
Հայաստանում Իրանի Իսլամական Հանրապետության դեսպան` Խալիլ Շիրղոլամին հանդիպել է Հայաստանի Հանրապետության տարածքային կառավարման և ենթակառուցվածքների նախարարի տեղակալ` Դավիթ Իվանյանի հետ և մտքեր փոխանակել տրանսպորտի, տարանցման և տրանսպորտային ենթակառուցվածքների ոլորտում երկկողմ համագործակցության զարգացման շուրջ:
Հանդիպման ընթացքում քննարկվել են ճանապարհային տուրքերի նվազեցման, ինչպես նաև երկու երկրների միջև ճանապարհային փոխադրումների և երթևեկության դյուրացման ուղիների հետ կապված հարցեր:
Կողմերը քննարկել են նաև երկաթուղային համագործակցության զարգացումը և Իրանի ու Հայաստանի երկաթուղային գծերի կարողությունների օգտագործումը՝ տարանցիկ երթուղիներն ամրապնդելու, ինչպես նաև Արևելյան Ասիայի երկրների, Սև ծովի տարածաշրջանի և Պարսից ծոցի հետ կապ ապահովելու նպատակով: Այս շրջանակներում քննարկվել է նաև Հայաստանի երկաթուղային գծերի կառուցման և զարգացման մրցույթներին իրանական ընկերությունների մասնակցության հնարավորությունը:
Հանդիպմանը քննարկված մյուս թեմաներից էր Իրան-Հայաստան երթուղով ուղևորատար ավտոբուսների համար համապատասխան հարմարություններով և ենթակառուցվածքներով օժտված ավտոբուսային տերմինալի ստեղծման առաջարկը, որի նպատակն է ուղևորափոխադրումները դյուրացնել և երկու երկրների միջև ցամաքային տրանսպորտային ծառայությունները բարելավել:
Բացի այդ, կողմերը քննարկել են օդային տրանսպորտի ոլորտում համագործակցության զարգացումը և այս բնագավառում փոխգործակցության ընդլայնման ուղիները:
