Սարգսյանը ԵՏԽ-ին զեկուցել է Ռոհանու հետ ունեցած բանակցությունների արդյունքները
Երկուշաբթի օրը Սանկտ Պետերբուրգում Ռուսաստանի նախագահ Վլադիմիր Պուտինի հյուրընկալությամբ գումարված Եվրասիական տնտեսական բարձրագույն խորհրդի նիստի ընթացքում անդամ երկրները քննարկեցին Իրանի հետ ազատ գոտի ստեղծելու հարցը:
ԻՌՆԱ-ի հաղորդման համաձայն, ՀՀ նախագահ Սերժ Սարգսյանն այս նիստի ընթացքում Իրանի ու ԵԱՏՄ-ի միջև համագործակցության ժամանակավոր պայմանագիր կնքելու ցանկություն հայտնելով պահանջեց ստորագրել այդ պայմանագիրը:
«Հայաստանը ակտիվորեն աջակցում է Եվրասիական տնտեսական հանձնաժողովի և Իրանի միջև բանակցային գործընթացին՝ նպատակ ունենալով որքան հնարավոր է արագ հասնել տվյալ համաձայնագրի ստորագրմանը»,-հայտարարել է ՀՀ նախագահը:
ՀՀ նախագահ Սերժ Սարգսյանը նիստի ընթացքում զեկուցել է անցած չորեքշաբթի օրը՝ Երևանում, ԻԻՀ նախագահ Հասան Ռոհանու հետ վարած բանակցությունների մասին, որի ընթացքում կողմերն ընդգծել են Պարսից ծոցը Սև ծովին կապող փոխադրության միջանցքի ստեղծման անհրաժեշտությունը:
«Հայաստանը՝ Իրանի հետ ցամաքային սահման ունեցող ԵԱՏՄ միակ անդամը, շեշտադրում է կատարում տրանսպորտային և լոգիստիկ ենթակառուցվածքների զարգացման վրա, այդ թվում՝ ներկայումս իրականացվող Հյուսիս-հարավ միջանցքի կառուցման շնորհիվ, որը ԵԱՏՄ շրջանակներում մեր գործընկերների համար հարմարավետ և անվտանգ հարթակ կստեղծի դեպի Պարսից ծով, այնուհետև Հնդկական օվկիանոս ելք ունենալու համար»,-հայտարարել է Սերժ Սարգսյանը:
