Իրանի և Ֆրանսիայի ԱԳ նախարարները քննարկել են Թեհրանի դեմ պատժամիջոցների վերականգնումը
Իրանի և Ֆրանսիայի արտաքին գործերի նախարարներ Աբբաս Արաղչին և Ժան-Նոել Բարոն հեռախոսազրույցի ընթացքում քննարկել են աճող լարվածությունը, որի ընթացքում Թեհրանը մերժել է Եվրոպայի «պատասխան միջոցները»՝ անվանելով դրանք անօրինական և ընդգծելով, որ դիվանագիտությունը միակ լուծումն է, հաղորդում է Mehr-ը։
Աբբաս Արաղչին և նրա ֆրանսիացի գործընկեր Ժան-Նոել Բարոն երեքշաբթի ուշ երեկոյան հեռախոսազրույց են ունեցել՝ քննարկելու E3-ի որոշման շուրջ աճող լարվածությունը՝ Իրանի դեմ պատժամիջոցների վերականգնման՝ «snapback» մեխանիզմն անօրինականորեն գործարկելու վերաբերյալ։
Բարոն մտահոգություն է հայտնել լարվածության ներկայիս դինամիկայի վերաբերյալ և ընդգծել է երկխոսության համար տարածք պահպանելու և դիվանագիտական ուղուն վերադառնալու կարևորությունը։
«Արաղչին վճռականորեն մերժել է ՄԱԿ-ի Անվտանգության խորհրդում այսպես կոչված «Ձգանի մեխանիզմի» ակտիվացումը եվրոպական պետությունների կողմից՝ այն անվանելով զուրկ որևէ քաղաքական կամ իրավական լեգիտիմությունից և քայլ, որը միայն կսրացնի ճգնաժամն ու անկայունությունը։
Վերահաստատելով Իրանի միջուկային ծրագրի խիստ խաղաղ բնույթը՝ Իրանի արտաքին գործերի նախարարը հիշեցրել է Թեհրանի և Ատոմային էներգիայի միջազգային գործակալության (ՄԱԳԱՏԷ) միջև վերջերս ձեռք բերված համաձայնագիրը», - հաղորդում են իրանական լրատվամիջոցները։
Արաղչին ընդգծել է, որ Իրանի Իսլամական Հանրապետությունը մշտապես դիվանագիտությունը դիտարկում է որպես միջազգային հարցերի, այդ թվում՝ իր միջուկային ծրագրի լուծման միակ միջոց, և հայտարարեց Իրանի պատրաստակամության մասին ցանկացած արդար և հավասարակշռված լուծման, որը երաշխավորում է փոխադարձ շահերը։
Նախարարները նաև քննարկել են երկկողմ հարաբերությունների վիճակը, այդ թվում՝ հյուպատոսական հարցերը, և ընդգծեցին Թեհրանի և Փարիզի միջև կանոնավոր շփումների և խորհրդակցությունների պահպանման անհրաժեշտությունը։
