Իրանի զսպողական կարողությունը՝ վճռական պատասխան ԱՄՆ-ի ռազմական սպառնալիքներին
Pars Today- Associated Press լրատվական գործակալության նոր հաղորդումը ցույց է տալիս, որ չնայած սիոնիստական ռեժիմի լայնածավալ հարձակումներին և ԱՄՆ-ի ռազմական ճնշումներին, Իրանը դեռևս ունի անօդաչու թռչող սարքերի և հրթիռային զգալի կարողություններ։ Կարողություն, որը, վերլուծաբանների կարծիքով, կարող է Թեհրանի դեմ ցանկացած նոր ռազմական արկածախնդրությանը դիմակայել կոշտ և տարածաշրջանային պատասխանով։
Ինչպես հաղորդում է ISNA լրատվական գործակալությունը՝ հղում անելով Associated Press-ին, ռազմական վերլուծաբանները խոստովանում են, որ Իրանը ոչ միայն չի կորցրել իր պաշտպանական կարողությունները հունիսյան 12-օրյա պատերազմից հետո, այլև դեռևս ի վիճակի է թիրախավորել ԱՄՆ ռազմական բազաները և տարածաշրջանում ռազմավարական էներգետիկ ենթակառուցվածքները: Այս գնահատականը հրապարակվել է այն պայմաններում, երբ Վաշինգտոնը Արևմտյան Ասիա ռազմական նավախմբեր ուղարկելով և ռազմական գործողություններով սպառնալով,կրկին սրել է լարվածության մթնոլորտը:
Ըստ հաղորդման՝ փորձագետներն ընդգծել են, որ գոյաբանական սպառնալիքի դեպքում Իրանն ունի ինքնապաշտպանության բազմաթիվ տարբերակներ՝ սկսած ԱՄՆ-ի բազաների թիրախավորումից մինչև լայնածավալ տարածաշրջանային պատասխաններ, որոնք կարող են փոխել ուժերի հավասարակշռությունը։ Ռազմական վերլուծաբան Սաշա Բրոխմանի խոսքով՝ ԱՄՆ-ի և նրա դաշնակիցների համար հիմնական մարտահրավերը ոչ թե հարձակումը, այլ Իրանի պատասխան գործողություններին դիմակայելն է։
Associated Press-ը նաև անդրադարձել է Իրանի հրթիռների և անօդաչու թռչող սարքերի հսկայական պաշարներին, գրելով, որ նույնիսկ հունիսյան պատերազմի ընթացքում այդ սպառազինությունների լայն կիրառությունից հետո, Թեհրանը դեռևս զգալի ներուժ ունի: Որոշ վերլուծաբաններ կարծում են, որ Իրանն ունի հազարավոր կարճ հեռահարության հրթիռներ և մեծ թվով երկար հեռահարության հրթիռներ, որոնք կարող են սպառնալ թշնամու զգայուն թիրախներին:
Ի պատասխան Իրանի պաշտպանական ծրագիրը սահմանափակելու Վաշինգտոնի սպառնալիքներին, Թեհրանի պաշտոնյաները հայտարարել են, որ երկրի պաշտպանական կարողությունները բանակցության ենթակա չեն, և ցանկացած ագրեսիվ քայլ կհանդիպի վճռական ու զսպող պատասխանի։ Այս ուղերձը ցույց է տալիս, որ ԱՄՆ-ի ճնշման և սպառնալիքների քաղաքականությունը ոչ միայն արդյունավետ չի եղել, այլ նաև նպաստել է Իրանի պաշտպանական ռազմավարության ամրապնդմանը։