ՄԱԿ-ի ԱԽ-ն ընդունել է Գազայի հատվածի վերաբերյալ ամերիկյան բանաձևը. ՀԱՄԱՍ–ը ողջունել է
ՄԱԿ-ի անվտանգության խորհուրդն ընդունել է Գազայի հատվածում հրադադարի մասին ամերիկյան բանաձևը:Տեղեկությունը հայտնում են համաշխարհային լրատվամիջոցները։
Բանաձևին կողմ է քվեարկել 14 երկիր, Ռուսաստանը ձեռնպահ է մնացել։
Բանաձևը մեծամասամբ կրկնում է Գազայում հրադադար հաստատելու եռափուլ առաջարկը: Փաստաթուղթը ՀԱՄԱՍ-ին կոչ է անում ընդունել այն նախաձեռնությունը, որն Իսրայելն արդեն ընդունել է։
Բանաձևի համաձայն՝ առաջին փուլը ներառում է անհապաղ և լիակատար հրադադար, Գազայի բնակավայրերից իսրայելական զորքերի դուրսբերում, ՀԱՄԱՍ-ի կողմից պահվող պատանդների մի մասի ազատ արձակում, ինչպես նաև կալանավորված պաղեստինցիների փոխանակում:
Երկրորդ փուլը նախատեսում է ռազմական գործողությունների անժամկետ դադարեցում ՝ պատանդների մնացած մասի ազատման դիմաց։
Փաստաթղթում ընդգծվում է, որ ռազմական գործողությունների անժամկետ դադարեցումը նախատեսված է միայն կողմերի համաձայնությամբ:
Երրորդ փուլը Գազայի վերականգնման բազմամյա ծրագրի սկիզբն է ։Բանաձևը մերժում է Գազայի հատվածում ժողովրդագրական կամ տարածքային փոփոխության ցանկացած փորձ, այդ թվում ՝ ցանկացած գործողություն, որը կրճատում է անկլավի տարածքը:
Պաղեստինյան ՀԱՄԱՍ շարժումը հայտարարել է, որ ողջունում է Գազայի հատվածում մշտական հրադադարի մասին ՄԱԿ-ի անվտանգության խորհրդի բանաձևը:
«ՀԱՄԱՍ–ը ողջունում է այն, որ ԱԽ–ի բանաձևում կետ է ներառված Գազայի հատվածում մշտական հրադադարի, Գազայի հատվածից զորքերի ամբողջական դուրսբերման, գերիների փոխանակման, տեղահանված անձանց իրենց բնակության վայրեր վերադարձի, ցանկացած ժողովրդագրական փոփոխություններից հրաժարվելու կամ Գազայի հատվածի տարածքի կրճատման, ինչպես նաև այդ հատվածում մեր ժողովրդին անհրաժեշտ օգնության տրամադրման մասին», - ասվում է պաղեստինյան շարժման հայտարարության մեջ:
ՀԱՄԱՍ շարժումը հայտնել է, որ պատրաստ է բանակցություններ սկսել բանաձևում նշված կետերի իրագործման համար։
