Պաշտպանական զինասարքեր արտադրելու համար ԻԻՀ-ն որևէ մեկից թույլտվություն չի խնդրելու. Ռոհանի
ԻԻՀ նախագահն ասել է. «Հակազրահային հրթիռներ և պաշտպանական զինասարքեր արտադրելու համար Իրանը թույլտվություն չի խնդրել ու չի խնդրելու որևէ մեկից և հզորությամբ շարունակելու է իր ուղին»:
ԻԻՀ ռադիոհեռուստատեսության լրատվական գործակալության հաղորդման համաձայն, ԻԻՀ նախագահ Հասան Ռոհանին, երկուշաբթի օրը Թեհրանի «Ազատության» հրապարակում իսլամական հեղափոխության հաղթանակի 40-ամյակի հանդիսության ժամանակ ասել է. «Աշխարհը պետք է իմանա, որ ԻԻՀ հզորությունն այսօր մի քանի անգամ գերազանցում է սրբազան պաշտպանության շրջանի ուժին և Իրանի զինված ուժերը տարբեր տեսակի զենքերի ու զինամթերքի արտադրության հարցում ինքնաբավ են դարձել»:
ԻԻՀ նախագահն անդրադառնալով երկիրը պաշտպանելու հարցում զինված ուժերի քաջությանն ու շահագրգռվածությանն ասել է. «Աշխարհը տեսավ, որ Իրանի կամքով ու օժանդակությամբ, Սիրիայի, Իրաքի ու Լիբանանի ժողովուրդները հաղթեցին և Պաղեստինում ու Եմենում էլ զավթիչների ու ագրեսորների հանդեպ դիմադրությունը շարունակվում է»:
«Թշնամին այսօր պարտավոր է հետզհետե խոստովանելով իր 20-ամյա պարտությունն ու տարածաշրջանում միջամտություններն, այստեղից հեռանալ, որպեսզի տարածաշրջանի ժողովուրդները հնարավորություն ունենան ազատ կերպով շարունակել զարգացման ու շենացման ուղին»,-հայտարարել է Ռոհանին:
ԻԻՀ նախագահն ընդգծել է. «Իսլամական հեղափոխության հաղթանակի քայլարշավին Իրանի ժողովրդի շքեղ ներկայությունն ապացուցեց, որ թշնամիների սադրանքները չեզոքացվել են: Նրանք երբեք չեն հասնելու իրենց նպատակներին և ԻԻՀ-ն անցած 40 տարիների նման շարունակելու է իր ուղին»:
Ռոհանին իր արտահայտությունների մեկ այլ բաժնում անդրադառնալով տարբեր ոլորտներում, այդ թվում՝ պետրոքիմիայի ոլորտում Իրանի արձանագրած առաջադիմություններին, հավելել է. «Ամբողջ աշխարհը հաստատում է Իրանի արագ տեմպերով զարգացումը»:
ԻԻՀ նախագահը նշել է, որ իսլամական համակարգը, հանրապետականությունը, ընտրությունների կազմակերպումն ու պատասխանատուներին ընտրելն ԻԻՀ-ի կարևոր նվաճումներից են:
