Մուսավի. Իրանում կրոնական ազատությունների մասին ԱՄՆ-ի զեկույցը կեղծ է և անհիմն
Իրանի արտգործնախարարության խոսնակն անդրադառնալով տարբեր երկրներում կրոնական ազատության մասին ԱՄՆ-ի ամենամյա զեկույցին, հայտարարել է, որ դա ակնհայտ միջամտություն է երկրների ներքին գործերին, հիմնված ապատեղեկատվության, դատապարտման և ժխտման վրա:
Սեյեդ Աբբաս Մուսավին, անդրադառնալով ԱՄՆ Պետդեպարտամենտի կողմից «Աշխարհում կրոնի ազատության մասին» տարեկան զեկույցի հրապարակմանը, հայտարարել է. «Զեկույցը կեղծ և անհիմն մեղադրանքներ է ուղղում Իրանի դեմ, հատկապես մեր երկրում բնակվող հրեաների իրավիճակի մասին, ինչը չի համապատասխանում իրականությանը»:
Դատապարտելով զեկույցում ներկայացված միակողմանի ու անհիմն մեղադրանքները, Մուսավին նշել է, որ զեկույցի բովանդակությունը վկայում է, որ այն կազմողները ճշգրիտ տեղեկություններ չունեն այդ կապակցւթյամբ Իրանում տիրող վիճակի մասին: Նա հավելել է. «ԱՄՆ-ի նման միջամտողական քայլերը դատապարտելի են»:
Մուսավին հավելել է. «Հիմնվելով Սահմանադրության վրա, Իրանը մշտապես հարգել է կրոնական փոքրամասնությունների իրավունքները և նրանք լիարժեք կերպով օգտվում են քաղաքացիական բոլոր իրավունքներից, այդ թվում նաև անմիջականորեն մասնակցելով երկրի քաղաքական գործընթացներին»:
