Իրանում սեփական գիտահենք արտադրանքի միջոցով իրականացվել է ռոբոտով առաջին հեռավոր վիրահատությունը
Իրանում կատարվել է ռոբոտի կիրառմամբ առաջին հեռավոր վիրահատությունը: Վիրահատությունն իրկանացվել է շան վրա, «Սինա» մասնագիտացված հիվանդանոցում, համանուն վիրաբույժ ռոբոտի միջոցով:
ԻՌՆԱ լրատվական գործակալության հաղորդմամբ, Սինա հիվանդանոցում գտնվող շան վիրահատությունն իրականացվել է լուսահոգի Իմամ Խոմեյնու անվան հիվանդանոցից: Վազեկտոմիայի վիրահատությունն իրականացվել է արբանյակային միացմամբ կառավարվող վիրաբուժական ռոբոտի միջոցով: Երկու հիվանդանոցների տարածությունը յոթ կիլոմետր է:
Սինա վիրաբույժ ռոբոտն անվանակոչվել է իրանցի գիտնական Աբու Ալի Սինայի (Ավիցեննա) անունով: Ռռոբոտը նախագծվել է ԱՄՆ-ում պատրաստված Դավինչի ռոբոտի օրինակով:
Այն իրենից ներկայացնում է վիրաբուժության համար նախատեսված արդիական համակարգ, որը երկու ռոբոտացված թևերի ու մոնիտորի միջոցով իրականացնում է վիրահատությունը:
Ռոբոտն ունի մեկ վիրաբուժական կոնսոլ, որի հետեւում կանգնած է վիրաբույժը: Նա երկու ռոբոտացված թևերի օգտագործմամբ ի վիճակի է վերահսկել և ուղղորդել վիրահատությունը: