ԻՀՊԿ. Ցանկացած սպառնալիք և ոտնձգություն կստանա կոշտ պատասխան
Իրանի Իսլամական հեղափոխության պահապանների կորպուսը (ԻՀՊԿ), հայրենիք վերադարձած ազատամարտիկների վերադարձի տարեդարձի առթիվ տարածած հայտարարության մեջ, ընդգծել է Իրանի դեմ ցանկացած սպառնալիքի դիմակայելու լիակատար պատրաստվածությունը։
Ինչպես հաղորդում է Pars Today-ը՝ վկայակոչելով Fars-ին, ԻՀՊԿ-ն իրաքյան բաասական ռեժիմի դեմ պարտադրված պատերազմի տարիներին գերությունից ազատված իրանցի զինծառայողներին ներկայացրել է որպես դիմադրության և տոկունության խորհրդանիշ։ Հայտարարության մեջ նշվում է, որ հեղափոխության պահապանները, առաջնորդվելով այդ օրինակով և համակարգված գործելով զինված ուժերի մյուս ստորաբաժանումների հետ, պաշտպանելու են Իրանի տարածքային ամբողջականությունը, անկախությունն ու ազգային շահերը։
Հայտարարության մեջ ընդգծվում է. «Ցանկացած սպառնալիք և ոտնձգություն լիակատար վճռականությամբ, առավելագույն զսպման ռազմավարության և հզոր հարձակողական գործողությունների միջոցով կջախջախենք»։
Միաժամանակ, ԱՄՆ նախագահ Դոնալդ Թրամփի՝ ԻՀՊԿ-ի պաշտոնյաների հետ գաղտնի բանակցությունների մասին պնդմանը արձագանքելով՝ ԻՀՊԿ-ի խոսնակը հայտարարել է, որ կորպուսի և ԱՄՆ-ի միջև որևէ բանակցություն չի ընթանում։ Նա այդ պնդումը որակել է որպես «պատերազմում պարտությունից և անելանելիությունից առաջացած պատրանքների ու մղձավանջների» հետևանք։