Ամիր Աբդոլլահյանն ու Իմրան Խանը կարևորել են Իրան-Պակիստան հարաբերությունների զարգացումը
ԻԻՀ արտաքին գործերի նախարարը և Պակիստանի վարչապետը վերահաստատել են երկկողմ հարաբերությունները զարգացնելու փոխադարձ վճռականությունը։
Կիրակի օրը, ԻԻՀ ԱԳ նախարար Հոսեյն Ամիր Աբդոլլահյանն Իսլամաբադում կայացած Իսլամական համագործակցության կազմակերպության (ԻՀԿ) արտակարգ նիստի շրջանակում հանդիպել է Պակիստանի վարչապետ Իմրան Խանի հետ։
ԻԻՀ արտաքին գործերի նախարարը հանդիպման ժամանակ ասել է. «Իրանի կառավարությունը հաստատակամ է զարգացնելու հարաբերությունները հարևանների, հատկապես Պակիստանի հետ, և ողջունում է երկու հարևանների հարաբերությունների խորացմանն ուղղված ցանկացած նախաձեռնություն»:
Հայտարարելով, որ Պակիստանը մեծ նշանակություն է տալիս Իրանի հետ իր հարաբերություններին, Պակիստանի վարչապետը նաև ընդգծել է երկու երկրների կարևոր դերակատարությունը Աֆղանստանում խաղաղության և կայունության հաստատման գործում:
Անդրադառնալով Աֆղանստանում տիրող իրավիճակին՝ Իմրան Խանը կոչ է արել արդյունավետ սիներգիա ստեղծել տարածաշրջանային և միջազգային դերակատարների միջև՝ այդ երկրում հումանիտար և տնտեսական ճգնաժամի կարգավորմանը նպաստելու նպատակով:
