Ամիր Աբդոլլահյանը հեռախոսազրույց է ունեցել Օմանի ԱԳ նախարարի հետ

ԻԻՀ ԱԳ նախարար Ամիր Աբդոլլահյանն իր օմանցի գործընկեր Բադր Ալբուսաիդիի հետ հեռախոսազրույցում քննարկել է երկկողմ, տարածաշրջանային և միջազգային ոլորտներում փոխադարձ հետաքրքրություն ներկայացնող հարցերի շրջանակ:

ԻՌՆԱ-ի հաղորդմամբ՝ ողջունելով Օմանի սուլթանի կառուցողական ջանքերը, Ամիր Աբդոլլահյանը ներկայացրել է ԻԻՀ դիրքորոշումները պատժամիջոցների վերացման շուրջ բանակցությունների վերաբերյալ։

Նա նաև ընդգծել է երկու երկրների միջև համապարփակ համագործակցության ռազմավարական փաստաթուղթը վերջնական տեսքի բերելու Իրանի Իսլամական Հանրապետության պատրաստակամությունը։

Հեռախոսազրույցում Օմանի ԱԳ նախարարն ընդգծել է Իրանի հետ երկկողմ հարաբերություններն ու տարածաշրջանային համագործակցությունն ընդլայնելու իր երկրի պատրաստակամությունը։