Իրանը քննադատել է ԱԽ անդամներին
ՄԱԿ-ում իրանի դեսպան և մշտական ներկայացուցիչը հայտարարել է. «ՄԱԿ-ի ԱԽ անդամները պետք է ձեռնպահ մնան պատժամիջոցները որպես իրենց անօրինական միակողմանի գործողությունների քող կամ որպես քաղաքական նպատակներ առաջ տանելու միջոց օգտագործելուց»:
Երեքշաբթի օրը կայացած նիստում, Ամիր Սեյեդ Իրվանին ասել է. «ԱԽ պատժամիջոցները պետք է ուշադիր գնահատվեն, քննարկվեն մարդասիրական հետևանքների տեսանկյունից և, անհրաժեշտության դեպքում, դրանք պետք է կասեցվեն»:
Իրանցի դիվանագետը նշել է. «ԱԽ արդյունավետությունը պետք է բարձրացվի շարունակական ջանքերի արդյունքում, որոնք առաջին հերթին պետք է հիմնված լինեն անդամների հանձնառության վրա, քանի որ համաշխարհային խաղաղության և անվտանգության մարտահրավերների դինամիկ և զարգացող բնույթը պահանջում է մշտական ջանքեր»:
Իրվանին հավելել է. «ԱԽ աշխատանքի արդյունավետությունը բարձրացնելու համար ամենաարդյունավետ մոտեցումը համապարփակ բարեփոխումների մեկնարկն է, որոնք Անվտանգության խորհուրդը կվերածեն լիովին թափանցիկ, օրենքի վրա հիմնված և ամենակարևորը՝ հաշվետու ինստիտուտի, որը կաջակցի օրենքի գերակայությանը և ՄԱԿ կանոնադրության նպատակներին ու սկզբունքներին՝ միաժամանակ ապահովելով բոլոր անդամների ընդհանուր շահերը»։
ՄԱԿ-ում Իրանի դեսպանն ընդգծել է. «Անվտանգության խորհուրդն իր բոլոր որոշումներում պետք է հավատարիմ մնա ՄԱԿ կանոնադրության նպատակներին և սկզբունքներին և անդամ երկրների ներքին գործերին միջամտությունը կանխելով՝ երաշխավորի, որ իր գործողությունները կհամապատասխանեն կազմակերպության կանոնադրությանը»: