Իրանի Արևելյան Ատրպատական նահանգի մաքսատներից 560 մլն դոլարի ապրանքների արտահանում է իրականացվել դեպի 90 երկիր, այդ թվում՝ Հայաստան
Իրանի հյուսիս-արևմուտքում գտնվող Արևելյան Ատրպատական նահանգի մաքսային հսկիչ Լեյլի Օրանգին հայտնել է վերջին հինգ ամսում նահանգի մաքսատներով դեպի աշխարհի 90 երկրներ, այդ թվում՝ Հայաստան 560 միլիոն դոլարի ապրանքների արտահանման մասին։
Իրանի Արևելյան Ատրպատական նահանգն ունի երեք գլխավոր մաքսատուն՝ Թավրիզում, Սահլանում և Ջուլֆայում և երեք մաքսակետ՝ Մարաղեում, Խոդաֆրինում և Նորդուզում:
ԻՌՆԱ-ի հետ զրույցում Օրանգին ասել է. «Վերջին հինգ ամիսների ընթացքում Արևելյան Ատրպատական նահանգի մաքսատներից արտահանվել է ավելի քան մեկ միլիոն տոննա ապրանք, ինչը, քաշային առումով, նախորդ տարվա նույն ժամանակահատվածի համեմատ աճել է 18 տոկոսով»։
Արևելյան Ատրպատականի մաքսային հսկիչը հայտարարել է, որ Արևելյան Ատրպատական նահանգի մաքսատներից արտահանման հիմնական թիրախային երկրներն են Հայաստանը, Թուրքիան, Իրաքը, Բուլղարիան, Վրաստանը, Ադրբեջանը, Աֆղանստանը, Ռուսաստանը, Արաբական Միացյալ Էմիրությունները և Պակիստանը։