Իրանում ՌԴ գործերի ժամանակավոր հավատարմատարը կանչվել է ԱԳՆ
ԻՌՆԱ-ի հաղորդմամբ՝ Թեհրանում ՌԴ դեսպանի բացակայության պայմաններում, այդ երկրի գործերի ժամանակավոր հավատարմատարը կանչվել է ԱԳՆ և նրան է փոխանցվել ԻԻՀ բողոքը՝ Մարոկկոյում կայացած արաբա-ռուսական համագործակցության ֆորումի 6-րդ նստաշրջանի հայտարարության մեջ պարունակվող անհիմն պնդումների կապակցությամբ:
Հանդիպմանն ԻԻՀ ԱԳՆ Պարսից ծոցի բաժնի գլխավոր տնօրենի օգնականը, հիշեցնելով երկրների ինքնիշխանության և տարածքային ամբողջականության հարգման անհրաժեշտությունը՝ որպես երկրների միջև հարաբերություններում հայտնի և հիմնարար սկզբունքներից մեկը, նշել է, որ Պարսից ծոցում գտնվող երեք կղզիներն Իրանի անբաժանելի մասնիկն են և Թեհրանն անընդունելի է համարում այս կապակցությամբ ցանկացած այլ պնդում:
Ռուսաստանի գործերի ժամանակավոր հավատարմատարն ընդգծել է, որ ԻԻՀ կառավարության բողոքները հնարավորինս արագ կփոխանցի իր երկրի իշխանություններին։