Ամիր Աբդոլլահյան․ Թել Ավիվը պետք է սպասի կոշտ հետհաշվարկին
Իրանի արտաքին գործերի նախարար Հոսեյն Ամիր Աբդոլլահյանը Սիրիայում Իրանի գլխավոր ռազմական խորհրդականներից մեկի՝ գեներալ Սեյեդ Ռեզի Մուսավիի նահատակության կապակցությամբ հղած ուղերձում ընդգծել է, որ Թել Ավիվը պետք է սպասի կոշտ հետհաշվարկին։
«X» սոցիալական ցանցի (նախկին Twitter) իր օգտահաշվում Ամիր Աբդալլահյանը Սիրիայում ահաբեկչության դեմ պայքար մղող իրանցի խորհրդական գեներալ Սեյեդ Ռեզի Մուսավիի նահատակության կապակցությամբ իր անկեղծ ցավակցությունն է հայտնել նրա հարազատներին և Իրանի ու Սիրիայի ժողովրդին։
Իրանի արտգործնախարարն ասել է․- Այս պատվավոր նահատակը երկար տարիներ քաջաբար կռվել է նահատակ Հաջ Ղասեմ Սոլեյմանիի կողքին՝ ապահովելու Իրանի և տարածաշրջանի անվտանգությունն ահաբեկիչների դեմ:
Աբդոլլահյանը նշել է, որ Թել Ավիվը պետք է սպասի կոշտ հետհաշվարկին։
Իսլամական հեղափոխության պահապանների կորպուսի «Ղոդս» ջոկատի խորհրդականներից գեներալ Սեյյեդ Ռեզի Մուսավին, ով ակտիվ գործունեություն է ծավալել Սիրիայում դիմադրությանն աջակցելու ոլորտում, երկուշաբթի օրը նահատակվել է Դամասկոսի Զայնաբիա շրջանի վրա Սիոնիստական ռեժիմի հարձակման ժամանակ։