Հրապարակվել է ԻԻՀ նախագահ Ռայիսիին տեղափոխող ուղղաթիռի վթարի մասին առաջին զեկույցը
Հրապարակվել է ԻԻՀ նախագահ Էբրահիմ Ռայիսիին և նրա ուղեկիցներին տեղափոխող ուղղաթիռի վթարի պատճառները հետաքննող հանձնաժողովի առաջին զեկույցը։
Ուղղաթիռը վթարի էր ենթարկվել մայիսի 19-ին Արևելյան Ատրպատական նահանգում։ Նախագահ Ռայիսին այդ օրը մասնակցել էր Ադրբեջանի հետ համատեղ Քիզ Քալասի ամբարտակի բացման արարողությանը։ Վթարի հետևանքով ԻԻՀ նախագահ Էբրահիմ Ռայիսին, ԱԳ նախարար Ամիր Աբդոլլահյանը, նրանց ուղեկիցները և ուղղաթիռի անձանակազմի անդամները զոհվել են։
Իրանի հեռուստատեսության լրատվական գործակալության հաղորդմամբ՝ ԶՈՒ ԳՇ կապի կենտրոնը հրապարակել է ուղղաթիռի վթարի հետաքննության առաջին արդյունքները։ Զեկույցում ներկայացված է տեխնիկական և ընդհանուր տեղեկատվության զգալի մասը, որը կարող է ինչ որ կերպ առընչություն ունենալ վթարի հետ։ Նշվում է, որ վերջնական հայտարարություն անելու համար անհրաժեշտ է ավելի շատ ժամանակ։
Զեկույցում ասվում է, որ ուղղաթիռի վթարի վերաբերյալ փաստաթղթերի մեծ մասը հավաքվել է, իսկ որոշ փաստաթղթերի համար ավելի շատ ժամանակ է անհրաժեշտ և հետաքննության արդյունքները բոլոր մանրամասներով կներկայացվեն քաղաքացիներին։
ԶՈՒ ԳՇ կապի կենտրոնը կոչ է արել Իրանի ժողովրդին ուշադրություն չդարձնել համացանցում տարբեր ենթադրությունների հիման վրա, երբեմն էլ օտարերկյա ցուցումներով հրապարակվող ոչ պրոֆեսիոնալ կարծիքներին։
