Իրանը, Չինաստանը և Ռուսաստանն Արևմուտքին կոչ են անում կատարել ՀԳՀԾ-ով ստանձնած պարտավորությունները
Նշելով, որ ՀԳՀԾ-ի դրույթները շարունակում են գործել, Իրանը, Չինաստանը և Ռուսաստանն Արևմուտքին կոչ են անում կատարել համաձայնագրով ստանձնած պարտավորությունները։ ՄԱԳԱՏԷ-ի կառավարիչների խորհրդի եռամսյակային հանդիպման ժամանակ ներկայացված եռակողմ հայտարարության մեջ ասվում է․ «Թեհրանը, Պեկինն ու Մոսկվան մշտապես եղել են ՀԳՀԾ-ի աջակիցները։
Եվ մեր վերաբերմունքը չի փոխվել նաև 2018-ից հետո, երբ ԱՄՆ-ն անօրինական կերպով դուրս եկավ ՀԳՀԾ-ից, իսկ հակաիրանական անօրինական պատժամիջոցների և առավելագույն ճնշման քաղաքականության կիրառումը բեկումնային դարձան այս համաձայնագրի համար»։
Հայտարարությունը ներկայացրել է Վիեննայում գործող միջազգային կազմակերպություններում ՌԴ մշտական ներկայացուցիչ, դեսպան Միխայիլ Ուլյանովը։
Նշելով, որ երեք երկրները ոչ մի ջանք չեն խնայել ՀԳՀԾ-ի վերականգնման ուղղությամբ, հայտարարության մեջ ասվում է․ «Վիեննայում կայացած բանակցությունների 8 փուլերի արդյունքում, Թեհրանը, Պեկինն ու Մոսկվան հայտարարեցին իրենց պատրաստակամությունը՝ համաձայնության գալ 2022 թվականի օգոստոսի տեքստի հիման վրա»։
Հայտարարության մեջ նաև ասված է․ «ՀԳՀԾ-ի մյուս կողմերը՝ Ֆրանսիան, Գերմանիան և Բրիտանիան, ինչպես նաև Միացյալ Նահանգները, չնայած իրենց խոստումներին, այլ ճանապարհ ընտրեցին և քաղաքական նկատառումներից ելնելով, անտեսեցին համաձայնագրի կիրառումը վերսկսելու մեր ընդհանուր նպատակը։ Չինաստանը, Իրանը և Ռուսաստանը համոզված են, որ ՀԳՀԾ-ի դրույթները շարունակում են գործել Անվտանգության խորհրդի 2231 բանաձևի շրջանակներում։ Եվ ժամանակն է, որ արևմտյան երկրները քաղաքական կամք դրսևորեն և անհրաժեշտ քայլեր ձեռնարկեն ՀԳՀԾ-ի իրագործումը վերսկսելու ուղղությամբ»։
2021թ դեկտեմբերի 27-ից 4+1 խմբի, Եվրամիության և Իրանի ներկայացուցիչների մասնակցությամբ, Վիեննայում կայացել է ՀԳՀԾ-ի վերականգնման շուրջ բանակցությունների 8 փուլ։
Բանակցություններին անուղղակիորեն ներկա է եղել նաև ամերիկյան պատվիրակությունը։ Բանակցությունները փակուղի մտան մի շարք պատճառներով, այդ թվում՝ գործողությունների հակասությունը, որոշումների կայացման ձգձգումը և ամերիկյան կողմի նոր պահանջները։
ՀԳՀԾ-ի շուրջ բանակցությունների ընթացքը ցույց տվեց, որ չնայած դիվանագիտական հայտարարություններին, ԱՄՆ-ն չունի քաղաքական կամք՝ վերադառնալու համաձայնագրին և փոխհատուցելու նախկին նախագահ Դոնալդ Թրամփի վարչակազմի հակաիրանական ձախողված քաղաքականության հտևանքները։
Իսկ Իրանը, որպես պատասխանատու երկիր, մշտապես հայտարարել է, որ պատրաստ է կնքել կայուն և հուսալի համաձայնագիր, որը երաշխավորված կերպով կվերացնի պատժամիջոցները և ապագայում Իրանի դեմ ուղղված շահարկումների առիթ չի դառնա։