Թեհրանն ու Ռիադը համատեղ զորավարժություններ կանցկացնեն․ ԱՄՆ-ի ազդեցությունը նվազո՞ւմ է
Սաուդյան Արաբիան առաջարկել է Իրանի հետ համատեղ ռազմածովային զորավարժություններ անցկացնել։
Փորձագետներն այս հայտարարություընը դրական քայլ են համարում Պարսից ծոցի և Կարմիր ծովի տարածաշրջաններում հարաբերությունների ամրապնդման և կայունության հաստատման ուղղությամբ։
Անդրադառնալով Իրան-Սաուդյան Արաբիա համատեղ զորավարժությունների անցկացման հավանականությանը, Շանհայի միջազգային հետազոտությունների համալսարանի Արևմտյան Ասիայի հետազոտությունների կենտրոնի տնօրեն Ջո Վայլին նշել է, որ դա վկայում է Պարսից ծոցի տարածաշրջանում ամերիկյան գերակայության և ազդեցության նվազման մասին։
«Սահաբ» գործակալությունը, հղում անելով ԻՌՆԱ-ին, հաղորդում է, որ Ջո Վայլին ասել է. «Երկու երկրների միջև դիվանագիտական հարաբերությունների վերականգնումից հետո ռազմական համագործակցությունը վկայում է Թեհրանի և Էր-Ռիադի հաշտեցման գործընթացում առաջընթացի մասին և կարող է հանգեցնել լարվածության թուլացման ու տարածաշրջանային համագործակցության ամրապնդման»։
Նշելով, որ զորավարժությունը կարող է անցկացվել Կարմի ծովում, փորձագետը հավելել է․ «Այս համագործակցությունը փաստում է, որ Թեհրանի և Էր-Ռիադի հաշտեցման գործընթացն առաջ է գնում»։
Նա հավելել է, որ այս համագործակցությունը կարող է նպաստել տարածաշրջանում լարվածության նվազմանը և նոր ոլորտներ բացել հետագա երկխոսության համար, ինչը բխում է ոչ միայն այս երկու երկրների, այլև միջազգային հանրության շահերից։
Չինացի փորձագետը նշել է նաև, որ ԱՄՆ-ն անկարող է կատարել իր պարտավորությունները և հավատարիիմ չի մնում իր խոստումներին։
Նրա խոսքով․ «Եթե Իրան-Սաուդյան Արաբիա համատեղ զորավարժություններն անցկացվեն, դա կնշանակի, որ Արևմտյան Ասիայի երկրները կորցրել են վստահությունը Վաշինգտոնի նկատմամբ»։