ՀՀ նախագահը երախտագիտություն է հայտնել երկրի տարածքային ամբողջականությանն աջակցելու Իրանի դիրքորոշման համար
Իսլամական Խորհրդարանի Իրան-Հայաստան բարեկամական խմբի ղեկավար Արա Շահվերդյանի գլխավորած պատվիրակությունը Երևան կատարած այցի ընթացքում հանդիպել և բանակցություններ է վարել Հայաստանի Հանրապետության նախագահի հետ։
Ինչպես հաղորդում է ԻՍՆԱ լրատվական գործակալությունը,Հայաստանի Հանրապետության նախագահ Վահագն Խաչատուրյանը գոհունակություն է հայտնել բոլոր ոլորտներում Իրանի և Հայաստանի հարաբերությունների ընդլայնման կապակցությամբ և ընդգծել Իրանի Իսլամական Հանրապետության հետ հարաբերություններն ընդլայնելու իր երկրի կառավարության լուրջ վճռականությունը։
Հայաստանի նախագահը կարևորել է նաև բարեկամական խմբերի ձևաչափով փոխգործակցությունը և օրենսդիր մարմինների ներկայացուցիչների պարբերական հանդիպումները՝ նկատի ունենալով խորհրդարանների նշանակալի դերը՝ երկկողմ հարաբերությունների զարգացման, փոխվստահության և լիարժեք փոխըմբռնման մթնոլորտի կառուցման գործում:
«Հայաստանը մեծապես կարևորում է Իրանի հետ բարիդրացիական հարաբերությունների հետևողական ամրապնդումը: Մեզ համար Իրանը եղել և մնում է առանձնահատուկ գործընկեր», ասել է ՀՀ նախագահը։
Իրան-Հայաստան բարեկամական խմբի ղեկավար՝ Արա Շահվերդյանը ևս այս հանդիպման ընթացքում նշել է, որ Իրանի Իսլամական Հանրապետությունը առաջնահերթությունն է իր հարեւանների հետ հարաբերությունների զարգացման քաղաքականությունը, և Հայաստանն այս առումով առանձնահատուկ դիրք ունի։
Արա Շավերդյանը Իրանի և Հայաստանի սահմանը համարել է բարեկամության և բարիդրացիության սահման և կարևորել է երկու երկրների ժողովուրդների պատմական ու խորը հարաբերությունները։
Շավերդյանը նաև ընդգծել է միջազգային սահմանների փոփոխությանը դեմ լինելու Իրանի Իսլամական Հանրապետության վճռական քաղաքականությունը և նշել, որ Հայաստանի տարածքում հաղորդակցության ուղիների ցանկացած ապաշրջափակում պետք է լինի այս երկրի ազգային և տարածքային ինքնիշխանության ներքո։ Նա նաև աջակցություն է հայտնել Հայաստանի և Ադրբեջանի միջև խաղաղության բանակցային գործընթացին։