Իրանը մտադիր է զարգացնել ռազմական համագործակցությունը Ռուսաստանի հետ. Փեզեշքիան
ԻԻՀ նախագահի խոսքով՝ Ռուսաստանի հետ մակրոմակարդակով պայմանավորվածություններ կան, սակայն մանրամասները կորոշվեն հետագա գործընթացներով:
Իրանը կզարգացնի համագործակցությունը Ռուսաստանի հետ ռազմական և անվտանգության ոլորտում, որպեսզի «թշնամին չկարողանա հեշտությամբ ոչնչացնել մեզ»: Այս մասին հայտարարել է Իրանի նախագահ Մասուդ Փեզեշքիանը հեռուստահաղորդավար Վլադիմիր Սոլովյովին տված հարցազրույցում։
«Եթե մյուս պետությունները հարձակվեն մեր երկրների վրա, ապա այն հիմքի վրա, ինչ գրված է պայմանագրում, մենք պարտավորություններ ենք ստանձնում ոչ մի դեպքում չմասնակցել ագրեսորներին օգնող գործընթացներին։ Մակրոմակարդակում մենք ունենք պայմանավորվածություններ Ռուսաստանի հետ, բայց մանրամասները կորոշվեն հետագա գործընթացներով և պայմանավորվածություններով», - ասել է Փեզեշքիանը։
Նրա խոսքով՝ ընդհանուր հայեցակարգն անհրաժեշտ է հետագայում գործնական ծրագրեր մշակելու համար։
«Բնականաբար, բոլոր ուղղություններով, որտեղ մենք կարող ենք օգնել միմյանց, ռազմական և անվտանգության ոլորտներում, մենք կփորձենք զարգացնել համագործակցությունը։ Մենք պետք է համագործակցենք, որպեսզի թշնամին չկարողանա հեշտությամբ գալ, ոչնչացնել մեզ և հեռանալ։ Թշնամին չպետք է որևէ պատրանք ունենա, որ կարող է հեշտությամբ հաղթել մեզ», - նշել է Իրանի նախագահը։
Նշենք, որ Ռուսաստանի և Իրանի նախագահներ Վլադիմիր Պուտինը և Մասուդ Փեզեշքիանը հունվարի 17-ին կայացած բանակցություններից հետո ստորագրել են երկու երկրների համապարփակ ռազմավարական գործընկերության մասին պայմանագիր: Ինչպես ավելի վաղ նշել էին Կրեմլում, այդ փաստաթուղթն արտացոլում է երկկողմ կապերի նոր մակարդակի դուրս գալը:
