Հարևանների հետ սերտ համագործակցությունը կօգնի չեզոքացնել պատժամիջոցները․ Փեզեշքյան
Հարևանների հետ սերտ համագործակցությունը և միջազգային համաձայնագրերի օգտագործումը կօգնեն Իրանին հաղթահարել տնտեսական մարտահրավերները և չեզոքացնել պատժամիջոցները:
Այս մասին «Tasnim» գործակալության հետ զրույցում ասել է նախագահ Մասուդ Փեզեշքյանը։
«Փոխգործակցությունը, առևտուրը և համագործակցությունը տարածաշրջանի երկրների, տարածաշրջանային կազմակերպությունների հետ, ինչպիսիք են ԵԱՏՄ–ն, ԲՐԻԿՍ–ը և ՇՀԿ-ն, ԱՄՆ պատժամիջոցները հաղթահարելու արդյունավետ միջոց են, և մենք կդիմակայենք այդ մարտահրավերներին ուժով, արժանապատվությամբ և պատվով»,- ասել է Իրանի նախագահ։
Նա օրենսդիրներին և քաղաքացիներին կոչ է արել աջակցել ներկայիս վարչակազմին տնտեսական խնդիրների և էներգետիկ անհավասարակշռության լուծման գործում:
«Եթե մենք միավորվենք, կարող ենք անհրաժեշտ պայմաններ ստեղծել մեր երկրում արտադրողների, արդյունաբերողների, կառավարիչների և տաղանդավոր մարդկանց հետ միասին խնդիրները լուծելու համար», - ավելացրել է նա:
Նշենք, որ Իրանի դեմ պատժամիջոցների կիրառման միջազգային ջանքերը գլխավորում է Միացյալ Նահանգները։ Մինչ ռուս-ուկրաինական հակամարտությունը, Իրանը եղել է աշխարհում ամենաշատ պատժամիջոցների ենթարկված երկիրը։ ԱՄՆ-ի կողմից առաջին պատժամիջոցները սահմանվել են դեռ 1979 թվականի նոյեմբերին։ Անցած տարիների ընթացքում պատժամիջոցները լուրջ վնաս են հասցրել Իրանի տնտեսությանն ու բնակչությանը։
