Բաղայի.  NPT պայմանագրի համաձայն՝  Իրանն իրավունք ունի օգտագործել խաղաղ ատոմային էներգիա  

ԻԻՀ ԱԳՆ խոսնակը հայտարարել է․ «Միջուկային զենքի չտարածման մասին պայմանագրի  4-րդ հոդվածի համաձայն՝ Իրանն ունի խաղաղ նպատակներով միջուկային էներգիա օգտագործելու լիակատար իրավունք, և Իրանը վճռական է տրամադրված՝ պահպանելու այս իրավունքը ցանկացած հանգամանքներում»:

Pars Today-ի փոխանցմամբ՝ «Ալ Ջազիրա»-ի հետ զրույցում Էսմայիլ Բաղային անդրադարձել է  Իրանի վրա ԱՄՆ-ի հարձակմանը և ԱՄՆ նախագահ Դոնալդ Թրամփի՝ Իրանի միջուկային ծրագիրը ոչնչացնելու մասին պնդմանը։
Նա ասել է․ «Իմ կարծիքով, կարևոր փաստը, որը չպետք է ստվերվի Միացյալ Նահանգների գեղեցիկ խոսքերի և տարբեր դիրքորոշումների տակ, այն է, որ մենք ականատես ենք եղել միջազգային իրավունքին, Միջազգայնության զենքի չտարածման մասին պայմանագրին և միջազգային էթիկային հասցված մահացու հարվածի։ Հետևաբար, ամենակարևոր հարցն այն է, որ միջազգային հանրությունը պետք է հասկանա, որ ԱՄՆ ռազմական հարձակումները ագրեսիայի ակտ էին Իրանի տարածքային ամբողջականության և ազգային ինքնիշխանության դեմ։ Սա է իրականությունը»։
Նա նշել է․ «Խաղաղ միջուկային էներգիա ունենալու Իրանի իրավունքը մնում է անփոփոխ։ Չտարածման պայմանագրի 4-րդ հոդվածի համաձայն՝ Իրանն ունի միջուկային էներգիան խաղաղ նպատակներով օգտագործելու լիակատար իրավունք, և Իրանը վճռականորեն է տրամադրված պահպանել այս իրավունքը ցանկացած հանգամանքներում»։
ԻԻՀ ԱԳՆ խոսնակը նշել է. «Միջազգային հանրությունը պետք է դատապարտի Միացյալ Նահանգների այս անօրինական գործողությունը և հասկանա, որ Միացյալ Նահանգների կողմից Իրանի դեմ կատարվածը սարսափելի հարված էր միջազգային դիվանագիտությանը, միջազգային իրավունքին և միջազգային բարոյականությանը»։
Նրա խոսքով․ «Չե՞ք կարծում, որ լիովին բնական է, որ բացահայտ բռնության ենթարկված ժողովրդի պատգամավորները  վերանայեն իրենց մոտեցումը Ատոմային էներգիայի միջազգային գործակալության նկատմամբ։ Այս ծրագիրն արտացոլում է այն ժողովրդի կամքը, որի երկիրը ենթարկվել է ագրեսիայի։ Այո՛, մեր խորհրդարանը  հաստատել է օրինագիծ, որում խոսվում է Ատոմային էներգիայի միջազգային գործակալության հետ մեր համագործակցությունը կասեցնելու մասին։ Ծրագիրը խոսում է համագործակցության կասեցման, այլ ոչ թե դադարեցման մասին։ Եվ նշում է երկու պայման. առաջինը՝ պետք է ճանաչվեն Իրանի անօտարելի իրավունքները՝ համաձայն NPT պայմանագրի 4-րդ հոդվածի։ Երկրորդ, պետք է ապահովվեն մեր միջուկային օբյեկտների,  գիտնականների և ժողովրդի  անվտանգությունն ու պաշտպանվածությունը։ Ուստի կարծում եմ՝ տրամաբանական է, որ եթե մենք ուզում ենք լինել Միջուկային զենքի չտարածման մասին պայմանագրի պատասխանատու անդամ, ապա պետք է կարողանանք օգտվել այն իրավունքներից, որոնք նախատեսված են պայմանագրի յուրաքանչյուր անդամ պետության համար։
Նշելով,  որ Իրանի դեմ ցանկացած ռազմական հարձակման կամ ագրեսիայի դեպքում երկիրն ինքնապաշտպանվեելու է, Բաղային հավելել է. «Այս պահին մենք կենտրոնացած ենք միայն մեր երկրի ու ժողովրդի անվտանգության  վրա, երբ իսրայելական ագրեսիան դադարի, քանի որ մարդիկ զայրացած են տեղի ունեցածի համար։ Հետևաբար այս պահին մենք ոչինչ չունենք ասելու դիվանագիտության կամ բանակցությունների վերաբերյալ  հակասական հայտարարությունների մասին, քանի որ մենք պետք է համոզվենք, թե արդյոք մյուս կողմերը իսկապես լո՞ւրջ են, երբ խոսում են դիվանագիտության մասին, թե՞ սա կրկին նրանց մարտավարության մի մասն է՝ տարածաշրջանի և Իրանի համար ավելի շատ խնդիրներ ստեղծելու համար»։