Իրանը զանգվածային ոչնչացման զենքից զերծ աշխարհի լուրջ կողմնակից է

Իրանի Սարդաշտ քաղաքի վրա իրաքյան Բաաս ռեժիմի կողմից քիմիական հարձակման 38-րդ տարելիցի կապակցությամբ Իրանի արտաքին գործերի նախարար Սեյեդ Աբբաս Արաղչին ընդգծել է, որ Իրանի Իսլամական Հանրապետությունը, որպես ժամանակակից պատմության մեջ քիմիական զենքի ամենամեծ զոհ, այդ զենքի դեմ պայքարում միշտ եղել է առաջամարտիկ և զանգվածային ոչնչացման զենքից զերծ աշխարհի կողմնակից։

Հղում անելով Իրանի արտաքին գործերի նախարարությանը՝ Pars Today-ը հաղորդում է, որ Արաղչին Սարդաշտի քիմիական ռմբակոծության տարելիցի և Քիմիական ու մանրէաբանական զենքի դեմ պայքարի ազգային օրվա կապակցությամբ իր ուղերձում նշել է. «Սարդաշտի վրա քիմիական հարձակումը (1987 թվականի հունիսի 29) քաղաքացիական բնակչության դեմ քիմիական զենքի առաջին լայնածավալ կիրառումն էր, որը ամոթի մշտական ​​բիծ է թողել դրա հեղինակների և իրականացնողների ճակատներին»։

Անդրադառնալով Իրաքի Բաաս ռեժիմը այդ զենքերով զինելու հարցում Արևմտյան տերությունների, այդ թվում՝ Միացյալ Նահանգների, Գերմանիայի, Բրիտանիայի և Ֆրանսիայի դերին և միջազգային կազմակերպությունների լռությանը, նա ասաց. «Այս հանցագործությունը ոչ միայն խլեց հարյուրավոր մարդկանց կյանքեր, այլև հազարավոր մարդկանց ընդմիշտ քիմիական ցավի ու տառապանքի մատնեց։ Արևմուտքի կողմից դեղորայքի ոլորտում պատժամիջոցների շարունակականությունը և քիմիական ռմբակոծությունից հաշմանդամ դարձած անձանց բուժման կանխարգելումը նույն հանցագործության շարունակությունն են»։

Արաղչին հավելել է. «Իրանի Իսլամական Հանրապետությունը կոչ է անում Քիմիական զենքի արգելման կազմակերպության գործադիր խորհրդի արտակարգ նիստ հրավիրել՝ քննարկելու և դատապարտելու սիոնիստական ​​ռեժիմի կողմից երկրի ենթակառուցվածքների, այդ թվում՝ քիմիական արդյունաբերության վրա վերջերս կատարված հարձակումնրը»։

Վերջում Իրանի արտգործնախարարը ընդգծեց. «Մենք հույս ունենք, որ կգա մի օր, երբ ոչ մի մարդ զանգվածային ոչնչացման զենքի զոհ չի դառնա, և խաղաղությունն ու բարեկամությունը կփոխարինեն պատերազմին ու բռնությանը»։