Արաղչի. Իրանի միջուկային գիտելիքները չեն ոչնչացվի ռմբակոծություններով

Pars Today - Իրանի Իսլամական Հանրապետության արտաքին գործերի նախարարը, ընդգծելով, որ «ուրանի հարստացման տեխնոլոգիաներն ու  գիտելիքները չեն ոչնչացվի ռմբակոծություններով», ասել է. «Իրանի խաղաղ միջուկային ծրագիրը դարձել է ազգային հպարտության և արժանապատվության հարց»։

Հղում անելով IRNA-ին, Pars Today-ը հաղորդում է, որ երեքշաբթի առավոտյան CBS-ին տված հարցազրույցում Իրանի Իսլամական Հանրապետության արտաքին գործերի նախարար Սեյեդ Աբբաս Արաղչին ԱՄՆ նախագահ Դոնալդ Թրամփի այն պնդման մասին, որ Իրանի հետ բանակցությունները կարող են վերսկսվել այս շաբաթ, ասել է. «Ես չեմ կարծում, որ բանակցությունները շուտով կվերսկսվեն»։

Նա հավելեց. «Բանակցություններին վերադառնալու որոշում կայացնելու համար մենք նախ պետք է համոզվենք, որ Միացյալ Նահանգները բանակցությունների ընթացքում մեզ կրկին ռազմական հարձակումների չի ենթարկի։ Կարծում եմ, որ հաշվի առնելով այս բոլոր նկատառումները, մեզ դեռ ավելի շատ ժամանակ է պետք»։

Իրանի արտգործնախարարը նաև ասել է. «Դիվանագիտության դռները երբեք չեն փակվի»։

Իրանի միջուկային օբյեկտների «ոչնչացման» մասին ամերիկացիների պնդման վերաբերյալ Արաղչին նշել է. «Ոչ ոք չի կարող ոչնչացնել ուրանի հարստացման տեխնոլոգիան և գիտելիքները ռմբակոծություններով։ Եթե մենք ցանկանանք և լինի այդպիսի կամք՝ այս ոլորտում կրկին առաջընթաց գրանցելու համար, ապա մենք կկարողանանք արագորեն վերականգնել կորուստները և կորցրած ժամանակը»։

Իրանի կողմից ուրանի հարստացման շարունակության վերաբերյալ հարցին ի պատասխան՝ Իրանի արտգործնախարարը նշել է, որ «Իրանի խաղաղ միջուկային ծրագիրը դարձել է ազգային հպարտության և արժանապատվության հարց։ Մենք անցել ենք պարտադրված պատերազմի միջով, և այդ պատճառով ժողովուրդը հեշտությամբ չի հրաժարվի ուրանի հարստացումից»։

Արաղչին ընդգծեց. «12 օր տևած պարտադրված պատերազմի ընթացքում մենք ցույց տվեցինք և ապացուցեցինք, որ ունակ ենք պաշտպանվել, և եթե մեր դեմ հարձակում լինի, մենք կշարունակենք պաշտպանվել»։