ՀՀ և Իրանի պաշտպանության նախարարները հեռախոսազրույցի ընթացքում քննարկել են համագործակցության օրակարգային հարցեր

ՀՀ պաշտպանության նախարար Սուրեն Պապիկյանը հուլիսի 9-ին հեռախոսազրույց է ունեցել Իրանի պաշտպանության և զինված ուժերի աջակցման նախարար, բրիգադի գեներալ Ազիզ Նասիրզադեի հետ։ Այս մասին տեղեկացնում է ՀՀ պաշտպանության նախարարության մամուլի ծառայությունը։

Զրուցակիցները քննարկել են միջազգային և տարածաշրջանային անվտանգության խնդիրներ, ինչպես նաև երկկողմ համագործակցության օրակարգային հարցեր։

Հեռախոսազրույցի ընթացքում երկու երկրների պաշտպանական գերատեսչությունների ղեկավարները ընդգծել են Հարավային Կովկասում կայունության և խաղաղության ապահովման կարևորությունը։ Նրանք վերահաստատել են պատրաստակամությունը՝ շարունակելու և խորացնելու պաշտպանական ոլորտում համագործակցությունը։

Նշենք, որ Հայաստանի և Իրանի միջև պաշտպանական կապերը վերջին տարիներին նկատելի ակտիվացել են՝ ընդգրկելով ռազմաքաղաքական խորհրդակցություններ, մասնագիտական փոխանակումներ և տարածաշրջանային անվտանգության հարցերում փոխըմբռնման խորացում։