Թեհրանում հերքում են, որ Պուտինը համաձայնել է Իրանոմ ուրանի «զրոյական» հարստացման գործարքին
Իրազեկ աղբյուրը հերքել է այն տեղեկությունը, թե Ռուսաստանի նախագահ Վլադիմիր Պուտինը Իրանին կոչ է արել համաձայնել միջուկային գործարքին, որը բացառում է ուրանի հարստացումը, հայտնում է Mehr-ը։
Գործակալության զրուցակիցը հայտնել է, որ Իրանը Պուտինից որևէ հաղորդագրություն չի ստացել ԱՄՆ-ի հետ ուրանի զրոյական հարստացմամբ միջուկային գործարքի վերաբերյալ։
Աղբյուրն ընդգծել է, որ Ռուսաստանի նախագահի և Իրանի արտաքին գործերի նախարար Աբաս Արաղչիի հետ վերջին հանդիպման ժամանակ այդ հարցը չի քննարկվել։
Ըստ աղբյուրի, այդ հանդիպումից հետո Ռուսաստանը և Իրանը կապի ուղիներով զրոյական հարստացման վերաբերյալ որևէ հաղորդագրությամբ նույնպես չեն փոխանակվել։
Ավելի վաղ ամերիկյան Axios պարբերականը հայտնել էր, որ Ռուսաստանի նախագահը Վաշինգտոնին և Թեհրանին հայտարարել է Իրանի «զրոյական հարստացմամբ» միջուկային գործարքին իր համաձայնության մասին։