Արաղչի. Իրանը բազմիցս զգուշացրել է Կովկասյան տարածաշրջանում օտարերկրյա ներկայության բացասական հետևանքների մասին

ԻԻՀ ԱԳ նախարարը կիրակի օրը հայտարարել է. «Կովկասյան տարածաշրջանում ցանկացած օտարերկրյա ներկայություն, անկախ ձևից, կարող է բացասական հետևանքներ ունենալ տարածաշրջանի խաղաղության և կայունության համար, և մենք միշտ բարձրացրել ենք այս հարցը ադրբեջանական և հայկական կողմերի հետ և կշարունակենք այն շեշտել»։

Pars Today-ի փոխանցմամբ՝ կառավարության նիստում պատասխանելով Ադրբեջանի   և Հայաստանի միջև համաձայնագրի վերաբերյալ հարցին, Արաղչին նշել է․ ««Զանգեզուրի միջանցքի» և բարձրացված այլ հարցերի վերաբերյալ Իրանի դիրքորոշումը լիովին պարզ է. մենք ողջունում ենք Երևանի և Բաքվի միջև խաղաղությունը և նախկինում հայտարարել ենք, որ պատրաստ ենք աջակցել կողմերին՝ խաղաղության գործընթացում»։ 

Նշելով, որ կովկասյան տարածաշրջանում ցանկացած օտարերկրյա ներկայություն կարող է բացասական հետևանքներ ունենալ տարածաշրջանային խաղաղության և կայունության համար, Արաղչին հավելել է. «Մեր դիրքորոշումներն այս տարածաշրջանի վերաբերյալ հստակ են. Իրանն ընդգծում է տարածաշրջանի բոլոր երկրների լիակատար ինքնիշխանությունը և տարածքային ամբողջականությունը և միջազգային սահմանները հարգելու անհրաժեշտությունը և չի ընդունում սահմանների որևէ փոփոխություն»։

Նա հավելել է. «Հայաստանի և Ադրբեջանի համատեղ հայտարարության մեջ նշվածը ներառում է հետևյալ երեք սկզբունքները՝ տարածաշրջանի երկրների ինքնիշխանության հարգումը, նրանց տարածքային ամբողջականության հարգումը և սահմանների ցանկացած փոփոխությանն ընդդիմությունը, որոնք լիովին համապատասխանում են Իրանի Իսլամական Հանրապետության դիրքորոշումներին»։

Իրանի արտգործնախարարը ընդգծել է. «Միջանցքի հարցը մի կողմ է դրվել, և քննարկումը վերաբերում է տարանցիկ ճանապարհի, որը կկառուցվի Հայաստանի ինքնիշխանության և իրավասության ներքո և այս երկրի տարածքում։ Բացի այդ, այս նախագծի իրականացումը ստանձնել է ամերիկա-հայկական ընկերությունը, որը գրանցված է Հայաստանում և գործում է այդ երկրի օրենքներով»։
Եզրափակելով, Արաղչին ասել է. «Թեհրանը զգուշացրել է տարածաշրջանում ցանկացած օտարերկրյա ներկայության մասին և ընդգծել, որ դա կարող է սպառնալ խաղաղությանը և կայունությանը։ Ամերիկյան ընկերության հնարավոր ներկայությունը այս նախագծում մտահոգության առիթ է Իրանի համար, և այս հարցը քննարկվել է կողմերի հետ։ Մենք ուշադիր հետևում ենք զարգացումներին»։